Follow Us On

21

September

2019

Saturday

വിവേകപൂര്‍വം ഭാഷ ഉപയോഗിക്കാം

വിവേകപൂര്‍വം ഭാഷ ഉപയോഗിക്കാം

യാത്ര ചെയ്യുമ്പോള്‍ പലയിടത്തും കാണുന്ന രണ്ടുതരം ബോര്‍ഡുകളെപ്പറ്റി പറയട്ടെ. ചില ബോര്‍ഡുകളില്‍ എഴുതിവച്ചിരിക്കുന്നത് ഇങ്ങനെയാണ്: ഇവിടെ മാലിന്യം നിക്ഷേപിക്കരുത്. രണ്ടാമത്തെ ബോര്‍ഡില്‍ എഴുതിവച്ചിരിക്കുന്നത് ഇങ്ങനെയാണ്: ഇവിടെ മാലിന്യം വലിച്ചെറിയരുത്.
ഈ രണ്ട് വാചകങ്ങളും വായിക്കുമ്പോഴും ആശയം വ്യക്തമാകും. എന്നാലും ഈ വാചകങ്ങള്‍ വായിക്കുമ്പോള്‍ ഒരു കല്ലുകടിച്ച അനുഭവം തോന്നുന്നു. ആദ്യം മാലിന്യം നിക്ഷേപിക്കുന്നതിനെപ്പറ്റി പറയട്ടെ. നിക്ഷേപിക്കുക എന്ന് പറഞ്ഞാല്‍ എന്താണ്? ബാങ്കില്‍ പണം നിക്ഷേപിക്കുന്നു എന്ന് സാധാരണ പറയാറില്ലേ? ബാങ്കില്‍ പണം നിക്ഷേപിക്കുന്നത് പിന്നീട് തിരിച്ചെടുക്കുവാനാണ്. സുരക്ഷിതമായി സൂക്ഷിക്കുക, പലിശ കിട്ടുക തുടങ്ങിയ ലക്ഷ്യങ്ങളോടെയാണ് ഇങ്ങനെ പണം നിക്ഷേപിക്കുന്നത്.
തിരിച്ചെടുക്കണം എന്ന ലക്ഷ്യത്തോടുകൂടിയോ അഥവാ പലിശയടക്കം കൂടുതല്‍ മാലിന്യം തിരിച്ചുകിട്ടണം എന്ന ലക്ഷ്യത്തോടുകൂടിയോ ആരെങ്കിലും എവിടെയെങ്കിലും മാലിന്യം കൊണ്ടുപോയി ഇടാറില്ലല്ലോ. ആരും മാലിന്യം നിക്ഷേപിക്കാറില്ല. എല്ലാവരും മാലിന്യം ഉപേക്ഷിക്കുകയോ ഒഴിവാക്കുകയോ ആണ് ചെയ്യുന്നത്. അതിനാല്‍ മാലിന്യം നിക്ഷേപിക്കരുത് എന്ന വാക്കുകള്‍ അര്‍ത്ഥമില്ലാത്തതും വായിക്കുമ്പോള്‍ സുഖം തരാത്തതുമായ വാക്കുകളാണ്.
രണ്ടാമത്തേത്, മാലിന്യം വലിച്ചെറിയരുത് എന്ന നിര്‍ദേശമാണ്. പലരും നടന്നു പോകുന്ന വഴിക്കും വണ്ടിയില്‍ പോകുന്ന വഴിക്കും മാലിന്യങ്ങള്‍ കൂടുകളിലാക്കി വലിച്ചെറിയുന്നുണ്ട് എന്നത് നേരാണ്. മറ്റുചിലര്‍ മാലിന്യം വലിച്ചെറിയുവാന്‍വേണ്ടി മാത്രം നടന്നുപോകുകയോ വണ്ടിയില്‍ പോകുകയോ ചെയ്യുന്നുണ്ട്. പക്ഷേ ഈ രണ്ടുവിധത്തില്‍ മാത്രമല്ലല്ലോ ഒരു സ്ഥലത്ത് മാലിന്യം കൊണ്ടുപോയി ഇടാവുന്നത്. വലിച്ചെറിയാതെ പതുക്കെ കൊണ്ടുപോയി ഇടാം. പതുക്കെ കൊണ്ടുപോയി വയ്ക്കാം. പതുക്കെ മറിച്ചിടാം. അങ്ങനെ പലവിധത്തില്‍ ചെയ്യാം. അതായത്, വലിച്ചെറിഞ്ഞുകൊണ്ടുമാത്രമല്ല ഒരു സ്ഥലത്ത് മാലിന്യം കൊണ്ടുപോയി ഇടാവുന്നത്. അതുകൊണ്ട് മാലിന്യം നിക്ഷേപിക്കരുത്, മാലിന്യം വലിച്ചെറിയരുത് തുടങ്ങിയ വാക്കുകള്‍ക്ക് പകരം കുറച്ചുകൂടി അര്‍ത്ഥം ഉള്ളതും വായിക്കുമ്പോള്‍ സുഖകരമായതുമായ വാക്കുകള്‍ ഉപയോഗിക്കുവാന്‍ കഴിയും. ഉദാഹരണത്തിന്, ഇവിടെ മാലിന്യം തള്ളരുത്, ഇവിടെ മാലിന്യം ഇടരുത് തുടങ്ങിയ വാക്കുകള്‍ ഉപയോഗിക്കുവാന്‍ കഴിയും.
ഇതുപോലെ നമ്മള്‍ ഭാഷ ഉപയോഗിക്കുമ്പോള്‍ പലപ്പോഴും വൈരുധ്യം നിറഞ്ഞ പ്രയോഗങ്ങള്‍ നടത്താറുണ്ട്. ഭയങ്കര സന്തോഷം, ഭയങ്കര രസം, ഭയങ്കര വലുപ്പം, ഭയങ്കര നീളം, ഭയങ്കര വണ്ണം, ഭയങ്കര ഉയരം എന്നിങ്ങനെയൊക്കെ നാം പറയാറില്ലേ. വാസ്തവത്തില്‍ സന്തോഷം, രസം തുടങ്ങിയ വാക്കുകളോട് ചേര്‍ന്നുപോകുന്നതാണോ ഭയങ്കരം എന്ന വാക്ക്? ഭയങ്കരം എന്ന വാക്ക് എപ്പോഴും അസ്വസ്ഥത ഉണ്ടാക്കുന്ന ഒരു സാഹചര്യത്തെ സൂചിപ്പിക്കാനാണ് ഉപയോഗിക്കേണ്ടത്. പരീക്ഷ ഭയങ്കര വിഷമമായിരുന്നു; ഇവിടെ ഭയങ്കര ചൂടാണ്; ശരീരത്തിന് ഭയങ്കര വേദനയാണ്; അവിടെ ഭയങ്കര സംഘര്‍ഷാവസ്ഥയാണ്; വിദ്യാര്‍ത്ഥികളുടെ ബാഗിന് ഭയങ്കര ഭാരമാണ്; അയാള്‍ ഭയങ്കര കടക്കെണിയിലാണ്; ബിസിനസ് ഭയങ്കര നഷ്ടത്തിലാണ് എന്നിങ്ങനെയൊക്കെ പറയുമ്പോള്‍ ഭയങ്കരം എന്ന വാക്ക് കുറച്ചുകൂടി അവസരോചിതമാണ്. പക്ഷേ നമ്മള്‍ നല്ല കാര്യങ്ങളുടെ കൂടെയും മോശം കാര്യങ്ങളുടെ കൂടെയും ഈ ഭയങ്കരം എന്ന വാക്ക് ഉപയോഗിച്ച് ശീലമായിപ്പോയി. അതിനാല്‍ പറയുന്നവര്‍ക്കും കേള്‍ക്കുന്നവര്‍ക്കും അതില്‍ ഒരു ഭംഗികേടോ ചേര്‍ച്ചക്കുറവോ തോന്നാറില്ല.
ഇനി മറ്റൊരു കാര്യം പറയട്ടെ. പല പൊതുസ്ഥാപനങ്ങളിലും പൊതുജനങ്ങളെ വിവരം അറിയിക്കാന്‍ പലതരം ബോര്‍ഡുകള്‍ വയ്ക്കാറുണ്ടല്ലോ. ഇത്തരം പല ബോര്‍ഡുകളും വായിക്കുമ്പോള്‍ അരിശവും സങ്കടവും ചിരിയുമൊക്കെ വരാറുണ്ട്. ഒരു സ്ഥാപനത്തില്‍ എഴുതിവച്ചിരിക്കുന്ന ഒരു ബോര്‍ഡ് ഇങ്ങനെയാണ്: You are under cc camera  ഇതു വായിച്ച ഞാന്‍ തല ഉയര്‍ത്തി മുകളിലേക്ക് നോക്കി. സീലിങ്ങില്‍ സി.സി. ക്യാമറ കാണുവാന്‍. അവിടെയെങ്ങും കണ്ടില്ല! എന്താ സംഭവം? You are under cc camera Surveillance  എന്നാണ് ബോര്‍ഡില്‍ എഴുതേണ്ടത്. പക്ഷേ എഴുതിയപ്പോള്‍ Surveillance എന്ന വാക്ക് ഉപേക്ഷിച്ചു. നിങ്ങള്‍ സി.സി ക്യാമറ നിരീക്ഷണത്തിലാണ് എന്ന് എഴുതുന്നതിനുപകരം നിങ്ങള്‍ സി.സി ക്യാമറയുടെ കീഴെയാണ് നില്‍ക്കുന്നത് എന്ന് എഴുതിവച്ചു. ഉന്നത വിദ്യാഭ്യാസം ഉള്ള ആളുകള്‍ ആ സ്ഥാപനത്തില്‍ പലര്‍ ഉണ്ട്. പക്ഷേ ഇത് കാണാനും തിരുത്താനുമുള്ള വിവേകം ഇല്ല. ഒരു ആശുപത്രിയുടെ കാഷ്വാല്‍റ്റിയുടെ മുമ്പില്‍ കാഷ്വാല്‍റ്റി എന്ന് എഴുതിവച്ചിരിക്കുന്നത് ഇംഗ്ലീഷിലാണ്. ശരിക്ക് വേണ്ട സ്‌പെല്ലിംഗ് CASUALTY എന്നാണ്. അവര്‍ എഴുതിവച്ചിരിക്കുന്നത് CASUALITY എന്നും. ഉന്നത ബിരുദമുള്ള ഡോക്ടര്‍മാരും നിരവധി വര്‍ഷത്തെ നഴ്‌സിങ്ങ് മേഖലയിലെ പഠന-ജോലി പരിചയമുള്ള ആളുകളാണ് ഇങ്ങനെ എഴുതിവച്ചിരിക്കുന്നത് എന്നതാണ് കഷ്ടം.
അതെ, ഭാഷ ഉപയോഗിക്കുമ്പോള്‍ കൂടുതല്‍ ശ്രദ്ധ പുലര്‍ത്തണം. ഇതിന് സാഹിത്യപഠനമോ അധികഭാഷാപഠനമോ ഒന്നും ആവശ്യമില്ല. ഉള്ള അറിവും കുറച്ചുകൂടി കോമണ്‍സെന്‍സും ഉപയോഗിച്ചാല്‍ മതി.

ജെ.വി പൈസക്കരി

Leave a Comment

Your email address will not be published. Required fields are marked with *

Latest Postss

Don’t want to skip an update or a post?