Follow Us On

24

October

2020

Saturday

ഈ വൈദികന്റെ  ദിവ്യബലിക്ക് ശക്തിയുണ്ടോ?

ഈ വൈദികന്റെ  ദിവ്യബലിക്ക് ശക്തിയുണ്ടോ?

വിശ്വാസം നഷ്ടപ്പെട്ടതിന്റെ വേദനകളുമായി വർഷങ്ങൾക്കുമുമ്പ് ഒരു യുവാവ് എന്റെ അടുക്കൽ വന്നു. ആ നാളുകളിൽ കേരളത്തിലെങ്ങും കോളിളക്കം സൃഷ്ടിച്ച ഒരു കൊലപാതകം നടന്നിരുന്നു. കൊലപാതകിയാകട്ടെ ഒരു വൈദികനും. ഇതാണ് ആ യുവാവിന്റെ വിശ്വാസം തകരാൻ കാരണം. വൈദികരെ ബഹുമാനിക്കാനും സ്‌നേഹിക്കാനും കഴിയുന്നില്ല. ഇങ്ങനെയുള്ള വൈദികരുടെയടുത്ത് കുമ്പസാരിച്ചിട്ടെന്തു കാര്യം? ഇത്തരം പുരോഹിതരർപ്പിക്കുന്ന ദിവ്യബലിക്ക് വല്ല ശക്തിയുമുണ്ടോ? ഇതൊക്കെയായിരുന്നു ആ യുവാവിന്റെ ചോദ്യങ്ങൾ.
ഇത്തരം അസ്വസ്ഥതകളുമായി കഴിയുന്ന അനേകരെ പിന്നീടും ഞാൻ കണ്ടുമുട്ടിയിട്ടുണ്ട്. മദ്യപിക്കുന്ന വൈദികന്റെയടുത്ത് മദ്യപാനിയായ ഞാൻ കുമ്പസാരിച്ചാൽ എന്തുപ്രയോജനം കിട്ടാനാണ്; അശുദ്ധിയിൽ ജീവിക്കുന്ന ഒരു പുരോഹിതൻ അർപ്പിക്കുന്ന ദിവ്യബലി എങ്ങനെ വിശുദ്ധനായ ദൈവത്തിന്റെ മുന്നിൽ സ്വീകാര്യമാകും; അതിൽ പങ്കുചേരുന്ന ജനത്തിന് ആ ദിവ്യബലികൊണ്ട് എന്തെങ്കിലും പ്രയോജനമുണ്ടോ?
സമർപ്പിതരുടെ ജീവിതത്തിലെ കുറവുകളുടെ പേരിൽ ദൈവത്തോടും സഭയോടും പുറംതിരിഞ്ഞു നിൽക്കുന്ന അനേകർക്കായ് ഞാൻ ഈ വരികൾ കുറിക്കട്ടെ. ഒരിക്കൽ പെരുവണ്ണാമൂഴിയിൽനിന്ന് കോഴിക്കോട്ടേക്ക് പോവുകയായിരുന്നു ഞാൻ. ടൗണിലെത്തിയപ്പോൾ ജംഗ്ഷനിലെ ട്രാഫിക് ഐലന്റിനുമുന്നിൽ അൽപ്പസമയം കാത്തുകിടക്കേണ്ടി വന്നു. ആ സമയത്താണ് ഈ ചിന്തകൾ എനിക്കുണ്ടായത്. ഈ ട്രാഫിക് പൊലീസുകാരൻ എന്നേപ്പോലെതന്നെയുള്ള ഒരു മനുഷ്യനാണ്. എന്നിട്ടും അയാൾ നിൽക്കാനുള്ള സിഗ്‌നൽ കാണിക്കുമ്പോൾ വണ്ടികളെല്ലാം നിർത്തുന്നു. പോകാൻ സിഗ്‌നൽ കൊടുക്കുമ്പോൾ വണ്ടികളെല്ലാം പോകുന്നു.
ഒരുപക്ഷേ ഈ വണ്ടികളിൽ ഇരിക്കുന്നവർ ആ പൊലീസുകാരനേക്കാളും വലിയ ഉദ്യോഗമുള്ളവരായിരിക്കും. വലിയ തറവാടുകളിൽ ജനിച്ചവരായിരിക്കും. ധാരാളം പണവും പ്രതാപവും ഉള്ളവരായിരിക്കും. എങ്കിലും ആ ട്രാഫിക് പൊലീസുകാരൻ പറയുന്നതനനുസരിച്ചേ അവർ വാഹനങ്ങൾ ഓടിക്കുകയുള്ളൂ. ഒരുപക്ഷേ, ആ പൊലീസുദ്യോഗസ്ഥന്റെ വ്യക്തിപരമായ ജീവിതം വളരെ കുറവുകൾ ഉള്ളതായിരിക്കും. അദ്ദേഹത്തേക്കാൾ വിശുദ്ധിയും സ്‌നേഹവും ജ്ഞാനവും മാന്യതയും നിങ്ങൾക്കായിരിക്കാം. എങ്കിലും നിങ്ങൾപോലും ആ പൊലീസുകാരൻ പറയുന്നത് അനുസരിക്കണം. എന്തുകൊണ്ടാണിത്?
പൊലീസ്‌സേനയിലേക്ക് തിരഞ്ഞെടുക്കപ്പെട്ടു എന്നതും ട്രാഫിക് നിയന്ത്രണത്തിനായി ദേശത്തിലെ നിയമപ്രകാരം മേലധികാരികൾ അയാളെ നിയോഗിച്ചു എന്നതുമാണ് അയാളുടെ ശക്തി. അയാളുടെ സ്വകാര്യ ജീവിതത്തിലെ കുറവുകൾ ഔദ്യോഗിക ജീവിതത്തിലെ അധികാരത്തിനോ ശക്തിക്കോ യാതൊരുവിധ ന്യൂനതയും ഉണ്ടാക്കുന്നില്ല. ഒരുപക്ഷേ, ഡ്യൂട്ടി കഴിഞ്ഞ് അയാൾ പോകുന്നത് മദ്യഷാപ്പിലേക്കായിരിക്കാം. എങ്കിലും പിറ്റേന്ന് അയാൾ വീണ്ടും ട്രാഫിക് ഐലന്റിൽ കയറിനിന്ന് സ്റ്റോപ് സിഗ്‌നൽ കാണിക്കുമ്പോൾ ഡ്രൈവർമാർ വാഹനം നിർത്തും. കാരണം അത് ദേശത്തിന്റെ ട്രാഫിക് നിയമവുമായി ബന്ധപ്പെട്ടു നിൽക്കുന്ന ശക്തിയാണ്. ഒരിക്കലും വ്യക്തിയുടെ യോഗ്യതയുമായി ആ നിയമം ബന്ധപ്പെടുന്നില്ല.
ഒരു ജഡ്ജിയുടെ കാര്യമെടുക്കുക. അദ്ദേഹവും നമ്മേപ്പോലൊരുവനാണ്. പക്ഷേ, നമുക്കൊരാളെ വധശിക്ഷയ്ക്ക് വിധിക്കാൻ കഴിയില്ല. എന്നാൽ, അദ്ദേഹത്തിന് ഒരു കുറ്റവാളിയെ വധശിക്ഷയ്ക്കുവരെ വിധേയനാക്കാം. എന്തുകൊണ്ടാണിത്? ഒരുപക്ഷേ ഈ ജഡ്ജി കൈക്കൂലി വാങ്ങുന്നവനാകും. എങ്കിലും കൈക്കൂലി വാങ്ങിയ ഒരു വ്യക്തിയെ ശിക്ഷിക്കാനുള്ള അധികാരം ജഡ്ജിയായിരിക്കുന്നിടത്തോളം കാലം അദ്ദേഹത്തിനുണ്ട്. അതുപോലെതന്നെ രാജ്യത്തിന്റെ നിയമങ്ങൾക്കു വിധേയനായി ഒരു കുറ്റവാളിയോട് ദയ കാണിച്ചുകൊണ്ട് ശിക്ഷ ഇളവുചെയ്യാനും അദ്ദേഹത്തിന് സാധിക്കും.
ന്യായാധിപൻ വെറുതെവിടാൻ വിധിച്ചാൽ മാത്രമേ ഒരു പ്രതിക്ക് സ്വതന്ത്രമായി ജീവിക്കാൻ അനുവാദം കിട്ടൂ. അതിനുപകരം ഞാനോ നിങ്ങളോ അയാളോട് ദയവുതോന്നി നിങ്ങളെ വെറുതെ വിട്ടിരിക്കുന്നു എന്നു പറഞ്ഞാൽ അയാളും ലോകവും ചിരിക്കും. കാരണം, ദേശത്തിലെ നിയമം നമുക്കതിനുള്ള അധികാരം തന്നിട്ടില്ല. ന്യായാധിപസ്ഥാനത്തേക്ക് തിരഞ്ഞെടുക്കപ്പെടുകയും ദേശത്തിന്റെ അധികാരിയാൽ നിയമനം ചെയ്യപ്പെടുകയും ചെയ്ത വ്യക്തിക്കുമാത്രമേ, കുറ്റാരോപിതനായ വ്യക്തിയെ മോചിപ്പിക്കാൻ അധികാരമുള്ളൂ.
ഇതുപോലെ സഭയും ദൈവികമായ ഒരു സംവിധാനമാണ്. സഭയിൽ കൂദാശകൾ പരികർമം ചെയ്യുന്ന വ്യക്തികൾ നമ്മെപ്പോലെയോ ഒരുപക്ഷേ നമ്മേക്കാളധികമോ കുറവുകളുള്ളവരാകാം. എങ്കിലും അവരുടെ തിരഞ്ഞെടുപ്പും നിയോഗവുംവഴി അവർക്ക് സവിശേഷമായി കിട്ടിയിരിക്കുന്ന ആത്മാവിന്റെ അഭിഷേകംമൂലം അവർ പരികർമം ചെയ്യുന്ന എല്ലാ കൂദാശകളും മൂല്യമുള്ളതായിത്തീരും. പൊലീസുദ്യോഗസ്ഥരും ജഡ്ജിയും മദ്യപാനിയോ ദുർമാർഗിയോ ആകരുത്. അവർ എല്ലാവർക്കും മാതൃകയുമാകണം. എങ്കിലും അവർ മദ്യപിച്ചതിന്റെ പേരിൽ പൊലീസുദ്യോഗസ്ഥനോ ജഡ്ജിയോ അല്ലാതാകുകയില്ല. നാം അവരെ അവരുടെ ഔദ്യോഗിക നിലയിൽ കാണുകയും ആദരിക്കുകയും ചെയ്യും.
ഇതുപോലെതന്നെ സ്വകാര്യജീവിതത്തിലെ കുറവുകളെയും അവഗണിച്ചുകൊണ്ടുതന്നെ പുരോഹിതരെ നാം ആദരിക്കണം, അംഗീകരിക്കണം. സഭയുടെ നിയമങ്ങൾക്കനുസരിച്ച് ഒരാൾ വൈദികനോ ബഷപ്പോ ആയി വാഴിക്കപ്പെട്ടാൽ, വ്യക്തിപരമായ യാതൊരു കുറവുകളും അദ്ദേഹത്തിന്റെ അഭിഷേകത്തിന്റെ ശക്തിയെ കുറക്കുന്നില്ല. പക്ഷേ, വ്യക്തിപരമായ കുറവുമൂലം അഭിഷേകത്തിന്റെ ശക്തി മനസ്സിലാക്കാനും ഉപയോഗിക്കാനും അദ്ദേഹത്തിന് സാധിക്കാതെ വരാം. എന്നാൽ, വിശ്വാസികളെ സംബന്ധിച്ചിടത്തോളം ഈ കുറവുകൾ അവർക്ക് ബാധകമല്ല.
ഇക്കാരണത്താൽ പാപിയായ വൈദികനും പാപമോചനം നൽകാനാകും. അയോഗ്യനായ വൈദികൻ അർപ്പിക്കുന്ന ദിവ്യബലിക്കും അയോഗ്യതയുമുണ്ടാവില്ല. ബലഹീനരായ മനുഷ്യരിലേക്കല്ല, പ്രത്യുത ബലഹീനരെ തിരഞ്ഞെടുത്തുപയോഗിക്കുന്ന ദൈവത്തിന്റെ അപരിമേയമായ കാരുണ്യത്തിലേക്കും ജ്ഞാനത്തിലേക്കുമാണ് നാം നോക്കേണ്ടത്. സഭ, ദൈവികമായ ഒരു സംവിധാനമാണെങ്കിലും അതിനൊരു ഭൗതിക വശമുണ്ട്. ഈ ഭൗതികവശം ഭൗതികമായ നിയമങ്ങളാലും ബലഹീനരായ മനുഷ്യരാലുമാണ് നിയന്ത്രിക്കപ്പെടുന്നത്.
ഇവിടെ പ്രശ്‌നങ്ങളും ക്രമക്കേടുകളും ധാരാളമായിട്ടുണ്ട്. ആദിമ നൂറ്റാണ്ടുമുതലേ ഉടലെടുത്ത മാനുഷികമായ ഈ കുറവുകൾ കർത്താവിന്റെ പുനരാഗമനംവരെ നീണ്ടുനിന്നേക്കാം. എന്നാൽ, സഭ ചരിത്രത്തിലൂടെ നയിക്കപ്പെടുകയും നിയന്ത്രിക്കപ്പെടുകയും ചെയ്യുന്നത് ദൈവികമായ നിയമങ്ങളാലാണ്. ഉപരിതലത്തിൽ വലിയ തിരമാലകൾ ഇളകിമറിയുമ്പോഴും കടലിന്റെ അടിത്തട്ട് ശാന്തമായിരിക്കുന്നതുപോലെ സഭയുടെ ആത്മീയതലം ശാന്തഗംഭീരമായിത്തന്നെ നിലകൊള്ളുന്നു. ഈ ആന്തരികതലത്തെ ദർശിക്കാൻ കഴിയാത്തവർക്ക് സഭ വെറുമൊരു സംഘടനയാണ്; സഭയുടെ അധികാരികൾ വെറും നേതാക്കന്മാരും. മാത്രമല്ല, സഭയുടെ മാനുഷിക തലത്തിലെ വൈകല്യങ്ങൾമൂലം അവർ സഭയെ വെറുക്കും, എതിർക്കും. വലിയൊരു അബദ്ധമാണിത്.
ക്രിസ്തുവിന്റെ ശരീരമായ സഭയ്ക്ക് തീർച്ചയായും ഒരു ഹൃദയമുണ്ട്. ആ ഹൃദയം കണ്ടെത്തിയാൽ, പിന്നൊരിക്കലും അതിനെ വേദനിപ്പിക്കുന്നതൊന്നും ചെയ്യാൻ നമുക്കാവില്ല. സഭയുടെ ആന്തരികശോഭ ദർശിക്കുന്നവർക്ക് ബാഹ്യതലത്തിലെ വൈകല്യങ്ങളെ ക്ഷമയോടെ ഉൾക്കൊള്ളാനാകും. ഈ ജൂബിലി വർഷത്തിൽ സഭയെ അതിന്റെ പൂർണതയിൽ ദർശിക്കാൻ ദൈവം നമുക്ക് കൃപ തരട്ടെ. അപ്പോൾ കൂദാശകളുടെ അമൂല്യതയും ദൈവവിളിയുടെ ശ്രേഷ്ഠതയും മനസ്സിലാകും. സഭയിലെ പ്രശ്‌നങ്ങൾ പക്വതയോടെ കാണാനും സഭയെ പണിതുയർത്തുന്നവിധം പ്രതികരിക്കാനും നമുക്കു സാധിക്കും.
Benny Punnathara
Chief Editor

Leave a Comment

Your email address will not be published. Required fields are marked with *

Similar Posts

Don’t want to skip an update or a post?