ന്യൂഡല്ഹി: ഐക്യരാഷ്ട്രസഭ അന്തര്ദേശീയ ന്യൂനപക്ഷ അവകാശദിനമായി പ്രഖ്യാപിച്ചിരിക്കുന്ന ഡിസംബര് 18ന് കാത്തലിക് ബിഷപ്സ് കോണ്ഫ്രന്സ് ഓഫ് ഇന്ത്യ ലെയ്റ്റി കൗണ്സിലിന്റെ നേതൃത്വത്തില് ദേശീയ ന്യൂനപക്ഷ അവകാശദിനമായി ആചരിക്കും. ഇതിന്റെ ഭാഗമായി രാജ്യത്തിന്റെ വിവിധ ഭാഗങ്ങളില് ന്യൂനപക്ഷ അവകാശാചരണ പരിപാടികള് സംഘടിപ്പിക്കും. സിബിസിഐയുടെ ഇന്ത്യയിലെ 14 റീജിയണല് കൗണ്സിലുകളുടെയും വിവിധ കത്തോലിക്കാ അല്മായ സംഘടനകളുടെയും, ക്രൈസ്തവ സഭാവിഭാഗങ്ങളുടെയും നേതൃത്വത്തിലാണ് ന്യൂനപക്ഷ അവകാശദിനം ആചരിക്കുന്നതെന്ന് സിബിസിഐ ലെയ്റ്റി കൗണ്സില് സെക്രട്ടറി ഷെവലിയര് അഡ്വ. വി.സി സെബാസ്റ്റ്യന് പറഞ്ഞു.
1992 ഡിസംബര് 18നാണ് ന്യൂനപക്ഷ അവകാശങ്ങളെക്കുറിച്ചും ദിനാചരണത്തെ ക്കുറിച്ചുമുള്ള ഐക്യരാഷ്ട്രസഭയുടെ ഔദ്യോഗിക പ്രഖ്യാപനമുണ്ടായത്. ഇന്ത്യയില് ക്രൈസ്തവ ന്യൂനപക്ഷങ്ങള് നേരിടുന്ന പ്രശ്നങ്ങള് ഉയര്ത്തിക്കാട്ടി കേന്ദ്ര സംസ്ഥാന സര്ക്കാരുകള്ക്ക് ഡിസംബര് 18ന് ലെയ്റ്റി കൗണ്സില് നിവേദനം നല്കും. രാജ്യത്തെ ന്യൂനപക്ഷ പദവിയുള്ള എല്ലാ ക്രൈസ്തവ സ്ഥാപനങ്ങളും ന്യൂനപക്ഷ അവകാശദിനാചരണത്തില് പങ്കുചേരണമെന്നും ഭരണഘടന ഉറപ്പുനല്കുന്ന ന്യൂനപക്ഷ അവകാശങ്ങളെക്കുറിച്ചും അവ നേടിയെടുക്കുന്നതിലെ പ്രതിസന്ധികളെക്കുറിച്ച് ചര്ച്ചചെയ്ത് നിര്ദ്ദേശങ്ങള് സമര്പ്പിക്കണമെന്നും അഡ്വ. വി.സി സെബാസ്റ്റ്യന് അഭ്യര്ത്ഥിച്ചു.
Leave a Comment
Your email address will not be published. Required fields are marked with *