കാക്കനാട്: അന്തര്‍ദേശീയ കത്തോലിക്ക അല്തമായ സംഘടനയായ ചെറുപുഷ്പ മിഷന്‍ ലീഗിന്റെ 2025-26 പ്രവര്‍ത്തന വര്‍ഷത്തിന്റെ  ഉദ്ഘാടനം അന്തര്‍ദേശീയ തലത്തില്‍ സംഘ ടിപ്പിക്കുന്നു. മിഷന്‍ ലീഗിന്റെ സ്വര്‍ഗീയ മധ്യസ്ഥയായ വിശുദ്ധ കൊച്ചു ത്രേസ്യയെ തിരുസഭ വിശുദ്ധ പദവിയിലേ ക്കുയര്‍ത്തിയതിന്റെ  100-ാം വാര്‍ഷിക ആചരണവും ഇതോടൊപ്പം നടത്തും.

മെയ് 17 ശനിയാഴ്ച്ച ഇന്ത്യന്‍ സമയം രാത്രി 8.30ന് നടക്കുന്ന ഓണ്‍ലൈന്‍ സമ്മേളനത്തില്‍ വിവിധ രാജ്യങ്ങളില്‍ നിന്നുമുള്ള  ഭാരവാഹികളും പ്രതിനിധികളും പങ്കുചേരും.

സീറോമലബാര്‍ സഭാ തലവനും മിഷന്‍ ലീഗിന്റെ രക്ഷാധികാരിയുമായ മേജര്‍ ആര്‍ച്ചുബിഷപ് മാര്‍ റാഫേല്‍ തട്ടില്‍ പരിപാടികള്‍ ഉദ്ഘാടനം ചെയ്യും. മിഷന്‍ ലീഗ് അന്തര്‍ദേശീയ  പ്രസിഡന്റ്  ഡേവിസ് വല്ലൂരന്‍ അധ്യക്ഷത വഹിക്കും.

സീറോ മലബാര്‍ സഭയുടെ ദൈവവിളി കമ്മീഷന്‍ ചെയര്‍മാനും  ചെറുപുഷ്പ മിഷന്‍ ലീഗിന്റെ സഹരക്ഷാധികാരിയുമായ ബിഷപ് മാര്‍ ജോസഫ് അരുമച്ചാടത്ത്, മുന്‍ സഹരക്ഷാധികാരി മാര്‍ ലോറന്‍സ് മുക്കുഴി എന്നിവര്‍ അനുഗ്രഹപ്രഭാഷണം നടത്തും.

ദൈവവിളി കമ്മീഷന്‍ സെക്രട്ടറി ഫാ. ജോഷി പാണംപറമ്പില്‍, മിഷന്‍ ലീഗ് അന്തര്‍ദേശീയ ഡയറക്ടര്‍ ഫാ. ജെയിംസ് പുന്നപ്ലാക്കല്‍, ജനറല്‍ സെക്രട്ടറി ബിനോയ് പള്ളിപ്പറമ്പില്‍, ജനറല്‍ ഓര്‍ഗനൈസര്‍ ജോണ്‍ കൊച്ചുചെറുനിലത്ത്, ഇന്ത്യന്‍ നാഷണല്‍ പ്രസിഡന്റ് സുജി പുല്ലുകാട്ട്, അമേരിക്കന്‍ നാഷണല്‍ പ്രസിഡന്റ് സിജോയ് സിറിയക് പറപ്പള്ളില്‍, അയര്‍ലണ്ട്  നാഷണല്‍ പ്രസിഡന്റ് ജിന്‍സി ജോസഫ്, ഖത്തര്‍ നാഷണല്‍ പ്രസിഡന്റ് ഷാജി മാത്യു, യു.കെ നാഷണല്‍ സെക്രട്ടറി  ജോജിന്‍ പോള്‍  എന്നിവര്‍ പ്രസംഗിക്കും.

സഭയുടെ പ്രേഷിത പ്രവത്തനങ്ങളെ പ്രോത്സാഹിപ്പിക്കുക എന്ന ലക്ഷ്യത്തോടെ ഫാ. ജോസഫ് മാലിപ്പറമ്പിലിന്റെയും പി.സി എബ്രഹാം എന്ന കുഞ്ഞേട്ടന്റെയും നേതൃത്വത്തില്‍ 1947 ഒക്ടോബര്‍ മൂന്നിന് ആരംഭിച്ച മുന്നേറ്റമാണ് ചെറുപുഷ്പ മിഷന്‍ ലീഗ്. ഭരണങ്ങാനത്ത് പ്രവര്‍ത്തനം ആരംഭിച്ച ഈ സംഘടന പിന്നീട് കേരളത്തില്‍ ഉടനീളവും ഇന്ത്യയിലെ വിവിധ പ്രദേശങ്ങളിലും വളര്‍ന്നു പന്തലിച്ചു. ഇപ്പോള്‍ അമേരിക്ക, കാനഡ, യു.കെ, അയര്‍ലണ്ട്, ഇറ്റലി, ജര്‍മ്മനി, സ്വിറ്റ്‌സര്‍ലാന്റ് ഓസ്‌ട്രേലിയ, ഖത്തര്‍ തുടങ്ങിയ രാജ്യങ്ങളില്‍ സജീവമായി പ്രവര്‍ത്തിച്ചുവരുന്നു.