തൃശൂര്‍:  കാന്‍സര്‍ രോഗംമൂലം മുടി നഷ്ടമായ 128 പേര്‍ക്ക് അമല മെഡിക്കല്‍ കോളേജ് ആശുപത്രി സൗജന്യമായി വിഗുകള്‍ നല്‍കി. അമല ഓഡിറ്റോറിയത്തില്‍ നടന്ന 38-ാമത് സൗജന്യ വിഗ് വിതരണ സമ്മേളനം കേരള യൂണിവേഴ്‌സിറ്റി ഓഫ് ഹെല്‍ത്ത് സയന്‍സസ് ഡീനും അമല കോളേജ് ഓഫ് നഴ്‌സിങ്ങ് പ്രിന്‍സിപ്പലുമായ ഡോ. രാജി രഘുനാഥ്  ഉദ്ഘാടനം  ചെയ്തു.

അമല മെഡിക്കല്‍ കോളേജ് ഡയറക്ടര്‍ ഫാ. ജൂലിയസ് അറയ്ക്കല്‍ സിഎംഐ അധ്യക്ഷത വഹിച്ചു. ജോയിന്റ് ഡയറക്ടര്‍ ഫാ. ജെയ്‌സണ്‍ മുണ്ടന്‍മാണി സിഎംഐ, ആലുവ സ്‌നേഹതീരം ഡയറക്ടര്‍ ഫാ. ജോബിന്‍ തെക്കേക്കര, താമരശേരി രൂപത കെസിവൈഎം ഡയറക്ടര്‍ ഫാ. ജോബിന്‍ തെക്കേക്കര, ഹെയര്‍ ഡോണേഴ്‌സ് പ്രതിനിധി ഡോ. സിവി അമൃത, തവനൂര്‍ കെഎംജി യു.പി സ്‌കൂള്‍ ഹെഡ്മിസ്ട്രസ് ബിന്ദു എസ്, ഡോ. സിസ്റ്റര്‍ നാന്‍സി എസ്.എച്ച്, പി.കെ സെബാസ്റ്റ്യന്‍ എന്നിവര്‍ പ്രസംഗിച്ചു.

സ്തനാര്‍ബുദം ബാധിച്ച 50   രോഗികള്‍ക്ക് കൃത്രിമ സ്തനങ്ങളും മീറ്റിങ്ങില്‍ സൗജന്യമായി വിതരണം ചെയ്തു. കേരളത്തിന്റെ വിവിധ ഭാഗങ്ങളില്‍ നിന്നുള്ള 200 പേര്‍ സമ്മേളനത്തില്‍ പങ്കെടുത്തു. കേശദാനം- സ്‌നേഹദാനം ക്യാമ്പുകള്‍ സംഘടിപ്പിച്ച 28 സ്ഥാപനങ്ങളെയും അമല ആശുപത്രിയില്‍വച്ച് മുടി മുറിച്ചു നല്‍കിയ 15 വ്യക്തികളെയും മെമന്റോയും സര്‍ട്ടിഫിക്കറ്റും നല്‍കി ആദരിച്ചു.

ഇതിനോടകം 2,200 കാന്‍സര്‍ രോഗികള്‍ക്ക്  അമല മെഡിക്കല്‍ കോളേജ് ആശുപത്രിയില്‍ നിന്നും സൗജന്യമായി വിഗുകളും 700 സ്തനാര്‍ബുദ രോഗികള്‍ക്ക് സൗജന്യമായി നിറ്റഡ് നോക്കേഴ്‌സും നല്‍കാന്‍ കഴിഞ്ഞതായി അമല ആശുപത്രി, ജോയിന്റ് ഡയക്ടര്‍ ഫാ. ജെയ്‌സണ്‍ മുണ്ടന്‍മാണി പറഞ്ഞു.