ഇടുക്കി: കത്തോലിക്കാ സഭ ഒക്ടോബര് മാസം ആഗോള മിഷന്‍ മാസമായി ആചരിക്കുന്നതിന്റെ ഭാഗമായി ഇടുക്കി രൂപതയില്‍ ഒക്ടോബര് 18 ശനിയാഴ്ച മിഷന്‍ മണിക്കൂര്‍ ആചരിക്കുന്നു. ശനിയാഴ്ച വൈകുന്നേരം 7 മണി മുതല്‍ 8 മണി വരെ രൂപതയിലെ എല്ലാ കുടുംബങ്ങളും മിഷന്‍ മണിക്കൂറില്‍ പങ്കെടുക്കും.
വാഴത്തോപ്പ് കത്തീഡ്രല്‍ പള്ളിയില്‍ നടക്കുന്ന മിഷന്‍ മണിക്കൂറിന് രൂപതാ മെത്രാന്‍ മാര്‍ ജോണ്‍ നെല്ലിക്കുന്നേല്‍ നേതൃത്വം നല്‍കും. കത്തീഡ്രല്‍ പള്ളിയില്‍ പ്രാര്‍ത്ഥനയോടെ ആരംഭിക്കുന്ന ശുശ്രൂഷയില്‍ വികാരി ഫാ. ലൂക്ക് ആനികുഴിക്കാട്ടില്‍ ആമുഖ സന്ദേശം നല്‍കും. തുടര്‍ന്ന് മിഷന്‍ ജപമാലയും മിഷന്‍ അനുഭവം പങ്കുവയ്ക്കലും നടക്കും. മാര്‍ ജോണ്‍ നെല്ലിക്കുന്നേലിന്റെ മിഷന്‍ സന്ദേശത്തോടും സമാപന ആശീര്‍വാദത്തോടും കൂടി മിഷന്‍ മണിക്കൂര്‍ സമാപിക്കും.
മിഷന്‍ വാരാചരണത്തോട് അനുബന്ധിച്ച് വാഴത്തോപ്പില്‍ ക്രമീകരിച്ചിട്ടുള്ള മിഷന്‍ എക്‌സിബിഷന്‍ കാണുന്നതിനുള്ള സൗകര്യവും ഏര്‍പ്പെടുത്തിയിട്ടുണ്ട്. കത്തീഡ്രല്‍ പള്ളിയില്‍ നടക്കുന്ന ശുശ്രൂഷകള്‍ സമൂഹമാധ്യമങ്ങളിലൂടെ തല്‍സമയം സംപ്രേഷണം ചെയ്യുന്നതാണ്.
ലോകത്തിന്റെ വിവിധ പ്രദേശങ്ങളില്‍ പ്രേക്ഷിത പ്രവര്‍ത്തനം നടത്തുന്ന മിഷനറിമാര്‍ക്ക് വേണ്ടി പ്രാര്‍ത്ഥിക്കുന്നതിനും വിശ്വാസ സമൂഹത്തില്‍ ആകമാനം പ്രേഷിത ചൈതന്യം വളരുന്നതിനും ഈ മിഷന്‍ മണിക്കൂര്‍ ആചരണം സഹായകമാകുമെന്ന് മാര്‍ ജോണ്‍ നെല്ലിക്കുന്നേല്‍ പറഞ്ഞു.
ഞായറാഴ്ച രൂപതയിലെ എല്ലാ പള്ളികളിലും മിഷന്‍ ഞായര്‍ വിപുലമായ പരിപാടികളോടെ ആചരിക്കും. ആഗോള സഭയുടെ പ്രേഷിത ചൈതന്യവും മിഷനറിമാര്‍ നടത്തുന്ന ത്യാഗപൂര്‍ണ്ണമായ ശുശ്രൂഷകളും ഇടുക്കി രൂപതയുടെ പ്രത്യേക മിഷന്‍ പ്രദേശമായ അരുണാചല്‍ പ്രദേശിലെ സാന്താ മരിയ മിഷനിലെ പ്രവര്‍ത്തനങ്ങളും ഒപ്പം ലിയോ പതിനാലാമന്‍ മാര്‍പാപ്പയുടെ മിഷന്‍ സന്ദേശവും ആളുകളില്‍ എത്തിക്കുന്നതിനും പരിചയപ്പെടുത്തുന്നതിനും സാധ്യമാകുന്ന പരിപാടികളാണ് മിഷന്‍ ഞായറിനോടനുബന്ധിച്ച് ഇടവകകള്‍ തോറും ക്രമീകരിച്ചിട്ടുള്ളത്.
രൂപതാ മുഖ്യ വികാരി ജനറാള്‍ മോണ്‍. ജോസ് കരിവേലിക്കല്‍, ഫാ. ലൂക്ക് ആനിക്കുഴികാട്ടില്‍ ഫാ. ഫിലിപ്പ് ഐക്കര, ഫാ. ആന്റണി പാലാപുളിക്കല്‍, ഫാ. ജിന്‍സ് കാരയ്ക്കാട്ട് എന്നിവര്‍ പരിപാടികള്‍ക്ക് നേതൃത്വം നല്‍കും.
Leave a Comment
Your email address will not be published. Required fields are marked with *