കാക്കനാട്: പുരോഹിതര് മിശിഹായോടുള്ള സ്നേഹത്താല് പ്രചോദിതരായി സഭയെ പടുത്തുയര്ത്തേണ്ടവരെന്ന് മേജര് ആര്ച്ചുബിഷപ് മാര് റാഫേല് തട്ടില്. സീറോമലബാര് സഭയുടെ കേന്ദ്ര കാര്യാലയമായ കാക്കനാട് മൗണ്ട് സെന്റ് തോമസില് 2025 -26 വര്ഷത്തില് പൗരോഹിത്യം സ്വീകരിക്കുന്ന ഡീക്കന്മാരുടെ സമ്മേളനത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.
പ്രാദേശികമായ ചിന്തകള്ക്കപ്പുറം സീറോമലബാര് സഭാംഗങ്ങളാണെന്നുള്ള സ്വത്വബോധം വൈദികരില് രൂപപ്പെടണമെന്ന് മേജര് ആര്ച്ചുബിഷപ് ഓര്മ്മിപ്പിച്ചു. വിവിധ രൂപതകള്ക്കും, സന്യാസ സമൂഹങ്ങള്ക്കുമായി തിരുപ്പട്ടം സ്വീകരിക്കുന്ന സീറോമലബാര് സഭാംഗങ്ങളായ 250 ഡീക്കന്മാരാണ് സഭാ ആസ്ഥാനത്തു ഒരുമിച്ചുകൂടിയത്.
ക്ലര്ജി കമ്മീഷന് ചെയര്മാന് ബിഷപ് മാര് ടോണി നീലങ്കാവില് സമ്മേളനത്തില് സ്വാഗതം ആശംസിച്ചു. പ്രശസ്ത ആത്യാത്മിക പ്രഭാഷകനും എഴുത്തുകാരനുമായ ഫാ. ബോബി ജോസ് കട്ടിക്കാട് മുഖ്യ പ്രഭാഷണം നടത്തി. സഭാ കാര്യാലയത്തിന്റെ ചാന്സലര് റവ. ഡോ. എബ്രഹാം കാവില് പുരയിടത്തില്, ക്ലെര്ജി കമ്മീഷന് സെക്രട്ടറി റവ. ഡോ. ടോം ഓലിക്കരോട്ട് എന്നിവര് പ്രസംഗിച്ചു. സീറോമലബാര് സഭയിലെ വൈദികര്ക്കുവേണ്ടിയുള്ള കമ്മീഷന്റെ ആഭിമുഖ്യത്തിലായിരുന്നു ഡീക്കന്മാരുടെ സമ്മേളനം നടത്തിയത്.
Leave a Comment
Your email address will not be published. Required fields are marked with *