ലണ്ടന്‍: ഫ്രാന്‍സിസ് മാര്‍പാപ്പയെ കാണുന്നതിനും കത്തോലിക്ക സഭയുടെ 2025 ജൂബിലി ആഘോഷങ്ങളില്‍ പങ്കെടുക്കുന്നതിനുമായി ഇംഗ്ലണ്ടിലെ ചാള്‍സ് രാജാവും കാമില രാജ്ഞിയും ഏപ്രിലില്‍ വത്തിക്കാനിലെത്തും. ബക്കിംഗ്ഹാം കൊട്ടാരം പുറപ്പെടുവിച്ച കുറിപ്പിലാണ് ഇക്കാര്യം വ്യക്തമാക്കിയത്. ഇരുവരും വത്തിക്കാനിലും റിപ്പബ്ലിക് ഓഫ് ഇറ്റലിയിലും സന്ദര്‍ശനം നടത്തുമെന്ന് പ്രസ്താവനയില്‍ പറയുന്നു. 2025 ജൂബിലി വര്‍ഷം ആഘോഷിക്കുന്നതില്‍ രാജാവും രാജ്ഞിയും ഫ്രാന്‍സിസ് മാര്‍പാപ്പയോടൊപ്പം ചേരും. പരമ്പരാഗതമായി 25 വര്‍ഷത്തിലൊരിക്കല്‍ നടക്കുന്ന ജൂബിലി കത്തോലിക്കാ സഭയെ സംബന്ധിച്ചിടത്തോളം പ്രത്യേക വര്‍ഷമാണെന്നും ‘പ്രതീക്ഷയുടെ തീര്‍ത്ഥാടകര്‍’ എന്ന നിലയില്‍ ഒരുമിച്ച് നടക്കുന്ന വര്‍ഷമാണെന്നും ബക്കിംഗ്ഹാം കൊട്ടാരത്തിന്റെ കുറിപ്പില്‍ പറയുന്നു.

2000 ജൂബിലി വര്‍ഷത്തില്‍ എലിസബത്ത് രാജ്ഞി വത്തിക്കാനിലെത്തി ജോണ്‍പോള്‍ രണ്ടാമന്‍ മാര്‍പാപ്പയോടൊപ്പം മഹാജൂബിലി ആഘോഷത്തില്‍ പങ്കുചേര്‍ന്നിരുന്നു. ജൂബിലി വര്‍ഷങ്ങളിലെ ബ്രിട്ടീഷ് രാജകീയ പങ്കാളിത്തത്തിന്റെ പാരമ്പര്യം ഈ സന്ദര്‍ശനത്തോടെ തുടരും. രാജാവായ ശേഷം ആദ്യമായാണ് ചാള്‍സ് രാജാവ് ഇറ്റലിയില്‍ എത്തുന്നത്. എന്നാല്‍ ഫ്രാന്‍സിസ് മാര്‍പാപ്പയുമായുള്ള അദ്ദേഹത്തിന്റെ മൂന്നാമത്തെ കൂടിക്കാഴ്ചയാണിത്. 2017-ല്‍ ഒറ്റയ്ക്കും 2019 -ല്‍ കാമിലയോടൊപ്പവും പാപ്പയുമായി ചാള്‍സ് രാജാവ് കൂടിക്കാഴ്ച നടത്തിയിരുന്നു. ഇറ്റലിയും യുകെയുമായുള്ള ശക്തമായ ഉഭയകക്ഷി ബന്ധം ഊട്ടിയുറപ്പിക്കുന്ന ചടങ്ങുകളില്‍ രാജാവും രാജ്ഞിയും പങ്കെടുക്കുമെന്ന് ബക്കിംഗ്ഹാം കൊട്ടാരം വ്യക്തമാക്കി.