മാര്ട്ടിന് വിലങ്ങോലില്
ഹൂസ്റ്റണ്: അമേരിക്കയിലെ ചിക്കാഗോ സീറോ മലബാര് രൂപതയുടെ രജതജൂബിലി ആഘോഷങ്ങളുടെ ഭാഗമായി 2026 ജൂലൈയില് ഷിക്കാഗോയില് നടക്കാനിരിക്കുന്ന ദേശീയ കണ്വെന്ഷന്റെ രജിസ്ട്രേഷന് നടപടികള്ക്ക് ഹൂസ്റ്റണ് സെന്റ് ജോസഫ് സീറോ മലബാര് ഫൊറോനായില് ഉജ്ജ്വല തുടക്കം കുറിച്ചു.
രൂപതാ പ്രോക്യുറേറ്ററും ഇടവകയുടെ മുന് വികാരിയുമായ ഫാ. കുര്യന് നെടുവേലിചാലുങ്കലിന്റെ നേതൃത്വത്തിലുള്ള കണ്വെന്ഷന് ടീമിന് ഇടവക വികാരി ഫാ. സെബാസ്റ്റ്യന് വലിയപറമ്പില്, അസിസ്റ്റന്റ് വികാരി ഫാ. ജോര്ജ് പാറയില് എന്നിവര് ചേര്ന്ന് ഊഷ്മളമായ വരവേല്പ്പ് നല്കി.
കണ്വെന്ഷന് സെക്രട്ടറി ബീന വള്ളിക്കളം, ഐടി നാഷണല് ചീഫ് കോ-ഓര്ഡിനേറ്റര് ജോര്ജ് നെല്ലിക്കുന്നേല്, രജിസ്ട്രേഷന് കോ-ഓര്ഡിനേറ്റര് സണ്ണി വള്ളിക്കളം എന്നിവര് കണ്വെന്ഷന്റെ രൂപരേഖ അവതരിപ്പിച്ചു. ട്രസ്റ്റിമാരായ പ്രിന്സ് ജേക്കബ്, സിജോ ജോസ്, ജോജോ തുണ്ടിയില്, വര്ഗീസ് കുര്യന് എന്നിവര് പരിപാടികള്ക്ക് നേതൃത്വം നല്കി.
മക്കോര്മിക് പ്ലേസില് വിശ്വാസ സംഗമം
2026 ജൂലൈ 9 മുതല് 12 വരെ ഷിക്കാഗോയിലെ വിഖ്യാതമായ മക്കോര്മിക് പ്ലേസ് കണ്വെന്ഷന് സെന്ററിലാണ് സഭാ സംഗമം അരങ്ങേറുന്നത്. നോര്ത്ത് അമേരിക്കയിലെ ഏറ്റവും കണ്വന്ഷന് സെന്ററാണിത്.
രൂപതയുടെ പ്രഥമ മെത്രാന് മാര് ജേക്കബ് അങ്ങാടിയത്തിന്റെ മെത്രാഭിഷേക ജൂബിലി ആഘോഷങ്ങളും ഇതോടൊപ്പം നടക്കും. ആത്മീയ വളര്ച്ച ലക്ഷ്യമിട്ടുള്ള ക്ലാസുകള്, ബിസിനസ് മീറ്റുകള്, യുവജനങ്ങള്ക്കും മുതിര്ന്നവര്ക്കുമായി പ്രത്യേകം തയ്യാറാക്കിയ ട്രാക്കുകള്, കലാപരിപാടികള്, മത്സരങ്ങള് തുടങ്ങി വൈവിധ്യമാര്ന്ന പരിപാടികളാണ് അണിയറയില് ഒരുങ്ങുന്നത്.
Leave a Comment
Your email address will not be published. Required fields are marked with *