കോട്ടപ്പുറം: ഫാ. റോക്കി റോബി കളത്തിലിനെ കോട്ടപ്പുറം രൂപതയുടെ വികാരി ജനറലായി ബിഷപ് ഡോ. അംബ്രോസ് പുത്തന്‍വീട്ടില്‍ നിയമിച്ചു. മുളങ്കുന്നത്തുകാവ് സാന്‍ജോസ് ഭവന്‍ ഡയറക്ടര്‍, രൂപത പിആര്‍ഒ, രൂപത ആലോചന സമിതി അംഗം, തൃശൂര്‍ തിരുഹൃദയ ലത്തീന്‍ പള്ളി വികാര്‍ കോര്‍പ്പറേറ്റര്‍, കേരള ലാറ്റിന്‍ കാത്തലിക് ഹിസ്റ്ററി അസോസിയേഷന്‍ (കെഎല്‍ സിഎച്ച്എ) ഡയറക്ടര്‍ എന്നീ നിലകളില്‍ പ്രവര്‍ത്തിച്ചു വരികയായിരുന്നു. ഫെബ്രുവരി 9 ന് ചുമതലയേല്‍ക്കും. മോണ്‍. ആന്റണി കുരിശിങ്കല്‍ പള്ളിപ്പുറം മഞ്ഞുമാത ബസിലിക്ക വികാരിയായും റെക്ടറായും ചുമതല ഏല്‍ക്കുന്ന ഒഴിവിലാണ് നിയമനം.
കോട്ടപ്പുറം രൂപത എപ്പിസ്‌കോപ്പല്‍ വികാരി, കേരള ലത്തീന്‍ സഭയുടെ മുഖപത്രമായ ജീവനാദത്തിന്റെ മാനേജിംഗ് എഡിറ്റര്‍, കെആര്‍എല്‍സിബിസി മീഡിയ കമ്മീഷന്‍ ഡയറക്ടര്‍ , വടക്കന്‍ പറവൂര്‍ ഡോണ്‍ ബോസ്‌കോ ആശുപത്രി ജോയിന്റ് ഡയറക്ടര്‍, ഡയറക്ടര്‍, ഫൊറോന വികാരി, തൃശൂര്‍ തിരുഹൃദയ ലത്തീന്‍ പള്ളി വികാരി, മുനമ്പം ഹോളി ഫാമിലി പള്ളി വികാരി, കോട്ടപ്പുറം രൂപത ഹെറിറേറജ് കമീഷന്‍ ഡയറക്ടര്‍, മീഡിയ കമ്മീഷന്‍ ഡയറക്ടര്‍, ജാഗ്രത കമ്മീഷന്‍ ഡയറക്ടര്‍, കോട്ടപ്പുറം രൂപത മതബോധനം-ബൈബിള്‍ അപ്പോസ്തലേറ്റ് ഡയറക്ടര്‍ ,കോട്ടപ്പുറം വികാസ് – അല്‍ബര്‍ട്ടൈന്‍ ആനിമേഷന്‍ സെന്റര്‍ ഡയറക്ടര്‍, വടക്കന്‍ പറവൂര്‍ ജൂബിലി ഹോം ഡയറക്ടര്‍ , രൂപത തിരുബാലസഖ്യം അള്‍ത്താര ബാലസംഘടന ഡയറക്ടര്‍, കെഎല്‍സിഡബ്ല്യുഎ ഡയറക്ടര്‍, കുറ്റിക്കാട് – കൂര്‍ക്കമറ്റം സെന്റ് ആന്റണീസ് മൈനര്‍ സെമിനാരി റെക്ടര്‍ – ഇന്‍- ചാര്‍ജ്, മണലിക്കാട് സെന്റ് ഫ്രാന്‍സിസ് അസീസി മൈനര്‍ സെമിനാരി വൈസ് റെക്ടര്‍, ഗോതുരുത്ത് സെന്റ് സെബാസ്റ്റ്യന്‍, കോട്ടപ്പുറം സെന്റ് മൈക്കിള്‍സ് കത്തീഡ്രല്‍ പള്ളികളില്‍ സഹവികാരി എന്നീ നിലകളില്‍ സേവനം ചെയ്തിട്ടുണ്ട്.
തത്വശാസ്ത്രത്തില്‍ ബിരുദാനനന്തര ബിരുദവും പത്രപ്രവര്‍ത്തനത്തില്‍ പോസ്റ്റ് ഗ്രാജ്വേറ്റ് ഡിപ്ലോമയും നേടിയിട്ടുണ്ട്. കോട്ടപ്പുറം രൂപതയിലെ ചാലക്കുടി ഹോളി ഫാമിലി ഇടവകയില്‍ ആളൂരിലെ കളത്തില്‍ വര്‍ഗീസ്- കൊച്ചുത്രേസ്യ ദമ്പതികളുടെ മകനാണ്. 2003 ജനുവരി ഒന്നിനായിരുന്നു വൈദികപട്ടം സ്വീകരിച്ചത്.
Leave a Comment
Your email address will not be published. Required fields are marked with *