പാരീസ്: പാരീസിലെ മോംപാനാസെയിലെ  പ്രശസ്ത കത്തോലിക്കാ ദൈവാലയമായ നോട്രെ ഡാം ഡെ ഷാംപ് ദൈവാലയത്തില്‍ 48 മണിക്കൂറിനിടെ രണ്ട് തവണ തീപിടുത്തം ഉണ്ടായതിനെ തുടര്‍ന്ന് ദൈവാലയം അടച്ചു.

ദൈവാലയത്തിന്റെ സൗണ്ട് സിസ്റ്റവും ഒര്‍ഗനും കത്തി നശിച്ച ആദ്യ തീപിടുത്തം ഇലക്ട്രിക്കല്‍ സര്‍ക്ക്യൂട്ടിലുണ്ടായ പ്രശ്‌നങ്ങളെ തുടര്‍ന്നാണെന്നാണ് കരുതുന്നത്. എന്നാല്‍ 24 മണിക്കൂറിനുള്ളില്‍ തന്നെ കൂടുതല്‍ നാശനഷ്ടങ്ങളുണ്ടാക്കിയ രണ്ടാമത്തെ തീപുടത്തമുണ്ടായി. അക്രമികള്‍ ബോധപൂര്‍വം തടികൊണ്ട് നിര്‍മിച്ച പാനലിന് തീ കൊടുത്തതാണ് രണ്ടാമത്തെ തീപിടുത്തത്തിന്റെ കാരണമെന്നാണ് വിവിധ റിപ്പോര്‍ട്ടുകള്‍ സൂചിപ്പിക്കുന്നു.

കഴിഞ്ഞ വര്‍ഷം ഇത്തരത്തില്‍ ദൈവാലയം നശിപ്പിക്കാനും കേടുപാടുകള്‍ വരുത്താനും ശ്രമിച്ച 50 സംഭവങ്ങള്‍ ഫ്രാന്‍സില്‍ റിപ്പോര്‍ട്ട് ചെയ്തിരുന്നു.
പാരീസ് നഗരസഭയുമായി ചേര്‍ന്ന് ഒരു സംയുക്ത പരാതി പോലീസിന് നല്‍കിയതായി വികാരി ഫാ. കാമിലെ മിലൗര്‍ പറഞ്ഞു. ദൈവാലയ പുനരുദ്ധാരണത്തിന്റെയും അന്വേഷണത്തിന്റെയും ഭാഗമായി ദൈവാലയം അനിശ്ചിത കാലത്തേക്ക് അടച്ചിടുകയാണെന്നും അദ്ദേഹം വ്യക്തമാക്കി.