ഇരിങ്ങാലക്കുട: ആശങ്കകളുടെയും പരാജയങ്ങളുടെയും ഇരുട്ടിലും പ്രകാശത്തിന്റെ തിരിനാളം കണ്ടെത്താന്‍ ശ്രമിക്കണമെന്ന പ്രതീക്ഷയുടെ സന്ദേശമാണ് ഇന്നസെന്റ് എന്ന മികച്ച കലാകാരന്‍ ബാക്കിവയ്ക്കുന്നതെന്ന് ഇരിങ്ങാലക്കുട രൂപതാധ്യക്ഷന്‍ മാര്‍ പോളി കണ്ണൂക്കാടന്‍.

സിനിമാ നടനായും ചാലക്കുടി ലോക്സഭാ മണ്ഡലത്തിന്റെ എംപിയായും കേരളത്തിന്റെ സാംസ്‌കാരിക, രാഷ്ട്രീയ മണ്ഡലങ്ങളില്‍ വ്യക്തിമുദ്ര പതിച്ച കലാകാരനായിരുന്നു ഇന്നസെന്റ.  ഇരിങ്ങാലക്കുടയുടെ മണ്ണില്‍ ജനിച്ചു വളര്‍ന്നു സിനിമയില്‍ മികവിന്റെ ഉയരങ്ങള്‍ താണ്ടിയപ്പോഴും താന്‍ കടന്നുവന്ന വഴികളെ അദ്ദേഹം വിസ്മരിച്ചില്ല. ജീവിത ത്തില്‍ നേരിട്ട നഷ്ടങ്ങളെയും പ്രതിസന്ധികളെയും എങ്ങനെ ശുഭാപ്തിവിശ്വാസത്തോടെ നേരിടാമെന്ന് സ്വന്തം ജീവിതാനുഭവങ്ങള്‍ നിരത്തി പുസ്ത കങ്ങളിലൂടെയും പ്രഭാഷണങ്ങളിലൂടെയും മറ്റുള്ളവര്‍ക്കു മുന്നില്‍ വരച്ചിട്ടു.

നര്‍മം മുഖമുദ്രയായിരുന്ന അദ്ദേഹത്തിന്റെ വാക്കുകള്‍ ജീവിതത്തില്‍ മുന്നോട്ടുപോകാന്‍ പലര്‍ക്കും പ്രതീക്ഷയും പ്രചോദനവുമായെന്ന് അനുശോചന സന്ദേശത്തില്‍ മാര്‍ പോളി കണ്ണൂക്കാടന്‍ പറഞ്ഞു.