കോട്ടപ്പുറം : ആഗോള കത്തോലിക്ക സഭയില്‍ 2025 ജൂബിലി വര്‍ഷ ആഘോഷങ്ങളുടെ ഭാഗമായി കോട്ടപ്പുറം രൂപതയില്‍ ജൂബിലി ആഘോഷങ്ങള്‍ക്ക് ഡിസംബര്‍ 29 -ന് വൈകിട്ട് നാലിന് ആരംഭം കുറിക്കും. ഇതോടനുബന്ധിച്ചുള്ള തിരുകര്‍മ്മങ്ങള്‍ കോട്ടപ്പുറം മാര്‍ക്കറ്റിലെ പുരാതനമായ സെന്റ് തോമസ് കപ്പേളയില്‍ കോട്ടപ്പുറം ബിഷപ് ഡോ. അംബ്രോസ് പുത്തന്‍വീട്ടിലിന്റെ മുഖ്യ കാര്‍മികത്വത്തില്‍ അരംഭിക്കും. തുടര്‍ന്ന് ബിഷപ്പിന്റെ നേതൃത്വത്തില്‍ വൈദികര്‍, സന്യസ്തര്‍, സംഘടനാ ഭാരവാഹികള്‍, മതാധ്യാപകര്‍, കുടുംബയൂണിറ്റ് ഭാരവാഹികള്‍, തുടങ്ങിയവര്‍ ജൂബിലി കുരിശുവഹിച്ച് പ്രദക്ഷിണമായി കത്തീഡ്രലിനു മുന്‍പിലെത്തും.
കത്തീഡ്രലിനു മുന്‍പില്‍ നടക്കുന്ന തിരുകര്‍മങ്ങള്‍ക്ക് ശേഷം മുഖ്യകാര്‍മികന്‍ ബിഷപ് ഡോ. അംബ്രോസ് കത്തീഡ്രലിന്റെ മുഖ്യകവാടം തുറന്നതിന് ശേഷം എല്ലാവരും കത്തീഡ്രലിലേക്ക് പ്രവേശിക്കും. തുടര്‍ന്ന് ബിഷപ് ഡോ. അംബ്രോസ് പുത്തന്‍വീട്ടിലിന്റെ മുഖ്യ കാര്‍മികത്വത്തില്‍ നടക്കുന്ന ദിവ്യബലിക്ക് രൂപതയിലെ വൈദികര്‍ സഹകാര്‍മ്മികരാകും. ജൂബിലി വര്‍ഷത്തില്‍ ഇടവക കേന്ദ്രീകരിച്ചുള്ള കര്‍മ്മപരിപാടികള്‍ക്കാണ് രൂപത ഊന്നല്‍ നല്‍കുന്നത്.
2024 ഡിസംബര്‍ 29 മുതല്‍ 2025 ഡിസംബര്‍ 28 വരെയാണ് രൂപതാതലത്തില്‍ ജൂബിലി ആഘോഷങ്ങള്‍ നടക്കുന്നത്. പ്രത്യാശയുടെ തീര്‍ത്ഥാടകള്‍ എന്ന വിഷയം കേന്ദ്രീകരിച്ചാണ് ആഗോളസഭയില്‍ ജൂബിലി ആഘോഷം നടക്കുന്നത്.
Leave a Comment
Your email address will not be published. Required fields are marked with *