ചിക്ലായോയിലെ ബിഷപ്പായിരുന്നപ്പോള്‍, ലിയോ പതിനാലാമന്‍ മാര്‍പ്പാപ്പ,  തന്റെ രൂപതയെ ഫാത്തിമ മാതാവിന് സമര്‍പ്പിച്ചു പ്രത്യേക പ്രാര്‍ത്ഥന  നടത്തിയ സംഭവം അനുസ്മരിച്ച് ചിക്ലായോ രൂപത വൈദികന്‍. പോര്‍ച്ചുഗലിലെ ഫാത്തിമ ദൈവാലയത്തില്‍ നിന്ന് വിശിഷ്ടമായ ഒരു മരിയന്‍ ചിത്രം ചിക്ലായോയിലേക്ക് എത്തിച്ച അവസരത്തിലാണ് ഈ പ്രതിഷ്ഠ നടത്തിയതെന്ന് ചിക്ലായോയിലെ ഹോളി ഫാമിലി ഇടവക വികാരിയായ ഫാ. ജോര്‍ജ് മില്ലന്‍ പറഞ്ഞു.
ചിക്ലായോ നഗരത്തിലെ ക്രൈസ്തവര്‍ മരിയ ഭക്തിക്ക് വളരെ പ്രാധാന്യം നല്കുന്നവരാണ്. 16 ാം നൂറ്റാണ്ടില്‍ ഫ്രാന്‍സിസ്‌കന്‍ സന്യാസിമാര്‍  ഇവിടുത്തെ ഈ നഗരത്തിന് ‘ഔര്‍ ലേഡി ഓഫ് ദി വാലീസ് ഓഫ് ചിക്ലായോ’ എന്ന നാമം നല്‍കിയത് ഇവിടുത്തെ ജനങ്ങള്‍ക്ക് മാതാവിനോടുള്ള സ്‌നേഹത്തിന്റെ അടയാളമായാണ്. മരിയഭക്തനായ മാര്‍പാപ്പ ഗ്വാഡലൂപ്പ മാതാവിന്റെയും ലൂര്‍ദ് മാതാവിന്റെയും കര്‍മല മാതാവിന്റെയും തിരുനാള്‍ദിനങ്ങളില്‍  ദിവ്യബലിയര്‍പ്പിച്ച് പ്രാര്‍ത്ഥിച്ചിട്ടുണ്ടെന്നും ഫാ. ജോര്‍ജ് പറഞ്ഞു.