കൊച്ചി: കേരളത്തിലെ ലത്തീന്‍ കത്തോലിക്കരുടെ ഉന്നത നയരൂപീകരണ ഏകോപന സമിതിയായ കേരള റീജ്യണ്‍ ലാറ്റിന്‍ കാത്തലിക് കൗണ്‍സിലിന്റെ (കെആര്‍എല്‍സിസി) 45-ാം ജനറല്‍ അസംബ്ലി ജൂലൈ 11 മുതല്‍ 13 വരെ ഇടക്കൊച്ചി ആല്‍ഫാ പാസ്റ്ററല്‍ സെന്ററില്‍ നടക്കും.

11ന് രാവിലെ 9.45ന് കെആര്‍എല്‍സിസി പ്രസിഡന്റ് ആര്‍ച്ചുബിഷപ് ഡോ. വര്‍ഗീസ് ചക്കാലയ്ക്കല്‍ ആമുഖ സന്ദേശം നല്‍കും. കേരള സര്‍വകലാശാല സെനറ്റ് അംഗം ഡോ. ജോസഫ് ആന്റണി മുഖ്യപ്രഭാഷണം നടത്തും.

ഉച്ചയ്ക്ക് 12ന് നടക്കുന്ന സമ്മേളനം കേന്ദ്ര  മന്ത്രി ജോര്‍ജ് കുര്യന്‍ ഉദ്ഘാടനം ചെയ്യും. ആര്‍ച്ചുബിഷപ് ഡോ. വര്‍ഗീസ് ചക്കാലയ്ക്കല്‍ അധ്യക്ഷത വഹിക്കും. കൊച്ചി രൂപത അപ്പസ്‌തോലിക് അഡ്മിനിസ്‌ട്രേറ്റര്‍ ബിഷപ് ഡോ. ജെയിംസ് റാഫേല്‍ ആനാപറമ്പില്‍ അനുഗ്രഹപ്രഭാഷണം നടത്തും. നെയ്യാറ്റിന്‍ കര രൂപതാ സഹായ മെത്രാന്‍ ഡോ. സെല്‍വരാജന്‍ ഡിയെ ചടങ്ങില്‍ ആദരിക്കും.

ഹൈബി ഈടന്‍ എംപി, കെ.ജെ മാക്‌സ് എംഎല്‍എ, കെആര്‍എല്‍സിസി വൈസ് പ്രസിഡന്റ് ജോസഫ് ജൂഡ്, സെക്രട്ടറി പാട്രിക് മൈക്കിള്‍ എന്നിവര്‍ പ്രസംഗിക്കും.

ഉച്ചകഴിഞ്ഞ് 2.30ന് നടക്കുന്ന സെമിനാറില്‍ അല്മായരുടെ പങ്കാളിത്തം സഭയിലും സമൂഹത്തിലും എന്ന വിഷയത്തില്‍ ഫാ. ബെന്നി പൂത്തറയിലും വിദ്യാഭ്യാസവും സാമൂഹിക മുന്നേറ്റവും എന്ന വിഷയത്തില്‍ തോമസ് കെ. സ്റ്റീഫനും പ്രബന്ധങ്ങള്‍ അവതരിപ്പിക്കും. മെറ്റില്‍ഡ മൈക്കിള്‍ മോഡറേറ്ററായിരിക്കും.

വൈകുന്നേരം ആറിന് തദ്ദേശസ്വയംഭരണ തിരഞ്ഞെടുപ്പ് സംബന്ധിച്ച ചര്‍ച്ചകള്‍ നടക്കും. കെഎല്‍സിഎ സംസ്ഥാന പ്രസിഡന്റ് അഡ്വ. ഷെറി ജെ. തോമസ് മോഡറേറ്ററായിരിക്കും. രാത്രി 8.45ന് കമ്മീഷന്‍ സെക്രട്ടറിമാരുടെയും രാഷ്ട്രീയകാര്യ സമിതിയുടെയും യോഗം നടക്കും.

ശനിയാഴ്ച രാവിലെ 9ന് നടക്കുന്ന സെമിനാറില്‍ ഫാ. നോയല്‍ കുരിശിങ്കല്‍, ഫാ. അരുണ്‍ തൈപ്പറമ്പില്‍ എന്നിവര്‍ പ്രബന്ധങ്ങള്‍ അവതരിപ്പിക്കും. പാട്രിക് മൈക്കിള്‍ മോഡറേറ്ററായിരിക്കും.  ഉച്ചക്ക് 12ന് നടക്കുന്ന ഗ്രൂപ്പ് റിപ്പോര്‍ട്ട് അവതരണത്തില്‍ പി.

ആര്‍ കുഞ്ഞച്ചന്‍ മോഡറേറ്ററായിരിക്കും. ഉച്ചകഴിഞ്ഞ് 2.30ന് നടക്കുന്ന സെമിനാറില്‍ സിസ്റ്റര്‍ നിരഞ്ജന, ഡോ. ബിജു വിന്‍സെന്റ് എന്നിവര്‍ പ്രബന്ധങ്ങള്‍ അവതരിപ്പിക്കും. വൈകുന്നേരം 6.30ന് കെആര്‍എല്‍സിസി കമ്മീഷനുകളുടെ വീഡിയോ റിപ്പോര്‍ട്ട് ഫാ. സ്റ്റീഫന്‍ തോമസ് ചാലക്കര അവതരിപ്പിക്കും.

രാത്രി 8.45ന് നടക്കുന്ന ഓപ്പണ്‍ ഫോറത്തില്‍ സംഘടനാ വിഷയങ്ങളും പൊതുപ്രശ്‌നങ്ങളും ചര്‍ച്ചചെയ്യും.

13ന് രാവിലെ 9ന് നടക്കുന്നഗ്രൂപ്പ് അവതരണത്തില്‍ ജെസി ജെയിംസ് മോഡറേറ്ററായിരിക്കും. 10ന് ജോസഫ് ജൂഡ് സാമൂഹ്യ രാഷ്ട്രീയ പ്രമേയം അവതരിപ്പിക്കും. തുടര്‍ന്ന് 44-ാമത് ജനറല്‍ അസംബ്ലിയുടെ റിപ്പോര്‍ട്ട് പ്രബലദാസും  കെആര്‍എല്‍സിസി പ്രവര്‍ത്തന റിപ്പോര്‍ട്ട് റവ. ഡോ. ജിജു ജോര്‍ജ് അറക്കത്തറയും അവതരിപ്പിക്കും. ബിജു ജോസി സാമ്പത്തിക റിപ്പോര്‍ട്ടും അഡ്വ. ഷെറി ജെ. തോമസ് രാഷ്ട്രീയകാര്യ സമിതി റിപ്പോര്‍ട്ടും അവതരിപ്പിക്കും.

12ന് സമാപന സമ്മേളനം നടക്കും. ജനറല്‍ അസംബ്ലിയില്‍ കേരള ലത്തീന്‍ സഭയിലെ ബിഷപ്പുമാരും എല്ലാ രൂപതകളിലെയും അല്മായ പ്രതിനിധികളും സന്യാസസഭകളുടെ പ്രതിനിധികളും പങ്കെടക്കും.