പാലാ: പാലാ രൂപതയുടെ പ്ലാറ്റിനം ജൂബിലി ആഘോഷങ്ങള് ജൂലൈ 26 ന് സമാപിക്കും. 2024 ജൂലൈ 26 ന് ഭരണങ്ങാനം വിശുദ്ധ അല്ഫോന്സ തീര്ത്ഥാടന ദൈവാലയത്തില് തുടക്കമിട്ട ജൂബിലിയാഘോഷങ്ങളുടെ സമാപനത്തിന് ആതിഥ്യമരുളുന്നത് പാലാ സെന്റ് തോമസ് കത്തീഡ്രല് ദൈവാലയമാണ്.
26 ന് രാവിലെ ഒമ്പതിന് സെന്റ് തോമസ് കത്തീഡ്രലിലെ വിശുദ്ധ കുര്ബാനയില് ചങ്ങനാശേരി അതിരൂപതാധ്യക്ഷന് മാര് തോമസ് തറയില് മുഖ്യകാര്മികത്വം വഹിക്കും. കെസിബിസി പ്രസിഡന്റ് കര്ദിനാള് ബസേലിയോസ് മാര് ക്ലീമിസ് കാതോലിക്ക ബാവ സന്ദേശം നല്കും.
10.45 ന് നടക്കുന്ന പൊതുസമ്മേളനം സീറോ മലബാര് സഭ മേജര് ആര്ച്ചുബിഷപ് മാര് റാഫേല് തട്ടില് ഉദ്ഘാടനം ചെയ്യും. കര്ദിനാള് മാര് ജോര്ജ് ആലഞ്ചേരി അധ്യക്ഷത വഹിക്കും. യാക്കോബായ സഭാധ്യക്ഷന് ബസേലിയോസ് ജോസഫ് കാതോലിക്ക ബാവ മുഖ്യപ്രഭാഷണവും പാലാ രൂപതാധ്യക്ഷന് മാര് ജോസഫ് കല്ലറങ്ങാട്ട് ആമുഖ പ്രഭാഷണവും നടത്തും.
കര്ദിനാള് ബസേലിയോസ് മാര് ക്ലീമിസ് കാതോലിക്ക ബാവ, സിബിസിഐ പ്രസിഡന്റ് ആര്ച്ചുബിഷപ് മാര് ആന്ഡ്രൂസ് താഴത്ത്, ആര്ച്ചുബിഷപ്പുമാരായ മാര് തോമസ് തറയില്, മാര് ജോസഫ് പാംപ്ലാനി, ഡോ. വര്ഗീസ് ചക്കാലയ്ക്കല്, ബിഷപ്പുമാരായ മാര് ജോസ് പുളിക്കല്, ഡോ. ജോസ് സെബാസ്റ്റ്യന് തെക്കുംചേരിക്കുന്നേല്, മാര് ജോസഫ് സ്രാമ്പിക്കല്, മാര് ജേക്കബ് അങ്ങാടിയത്ത്, മാര് ജോസഫ് കൊല്ലംപറമ്പില്, മാര് ജോസഫ് പള്ളിക്കാപറമ്പില്, കേന്ദ്രമന്ത്രി ജോര്ജ് കുര്യന്, മന്ത്രി റോഷി അഗസ്റ്റിന്, കെപിസിസി പ്രസിഡന്റ് സണ്ണി ജോസഫ് എംഎല്എ, ഫ്രാന്സിസ് ജോര്ജ് എംപി, ജോസ് കെ. മാണി എംപി, ശശി തരൂര് എംപി, അസീറിയന് സഭ മെത്രാപ്പോലീത്ത മാര് ഔഗേന് കുര്യാക്കോസ്, കുര്യാക്കോസ് മാര് സെവേറിയോസ്, മലബാര് സ്വതന്ത്ര സുറിയാനി സഭ മെത്രാപ്പോലീത്ത സിറിള് മാര് ബസേലിയോസ്, മാണി സി. കാപ്പന് എംഎല്എ, പി.സി. ജോര്ജ്, നിലയ്ക്കല് മെത്രാപ്പോലീത്ത ജോഷ്വ മാര് നിക്കാദേമോസ്, സിഎസ്ഐ ബിഷപ് റവ. വി.എസ്. ഫ്രാന്സിസ്, പാലാ രൂപത മുഖ്യവികാരി ജനറല് മോണ്. ജോസഫ് തടത്തില്, പാലാ രൂപത പാസ്റ്ററല് കൗണ്സില് ചെയര്മാന് ഡോ. കെ.കെ ജോസ്, സിസ്റ്റര് മരീന ഞാറക്കാട്ടില്, ഷീബ ബിനോയി പള്ളിപറമ്പില് എന്നിവര് പ്രസംഗിക്കും.
Leave a Comment
Your email address will not be published. Required fields are marked with *