ചെന്നൈ: കോവിഡ് മഹാമാരി കാലത്ത് ആരംഭിച്ച തുടര്‍ച്ചയായ ഓണ്‍ലൈന്‍ ജപമാലയുടെ 1550-ാം ദിനം ആഘോഷിച്ചു. ദൈവാലയങ്ങള്‍ അടഞ്ഞുകിടന്നിരുന്ന കാലത്ത് യുവാക്കളെ ആത്മീയതയില്‍ നിലനിര്‍ത്തുന്നതിനായി ചെന്നൈ അതിരൂപതയുടെ യൂത്ത് കമ്മീഷന്‍ ഡയറക്ടര്‍ ഫാ. റൊണാള്‍ഡ് റിച്ചാര്‍ഡ് 2021 മെയ് 16-നാണ് അണൈ മേരി പ്രാര്‍ത്ഥന ഗ്രൂപ്പ് ആരംഭിച്ചത്.

യൂത്ത് കമ്മീഷന്റെ സജീവ പ്രവര്‍ത്തകനായിരുന്ന റെജിലാന്റെ നേതൃത്വത്തില്‍ മെയ് 24-ന് ഓണ്‍ലൈന്‍ ജപമാല ആരംഭിക്കുകയായിരുന്നു. കോവിഡ് കാലമായിരുന്നതിനാല്‍ യുവജനങ്ങള്‍ സജീവമായി പങ്കെടുക്കാന്‍ തുടങ്ങി. ജപമാല 100 ദിവസം, 200 ദിവസം, ഒരു വര്‍ഷം, 550 ദിവസം എന്നിങ്ങനെ പിന്നിട്ട് നാല് വര്‍ഷവും കടന്ന് 1550-ാം ദിനം ആഘോഷിച്ചു.

സാന്തോം ബസിലിക്കയില്‍ നടന്ന 1,550-ാം ദിനാഘോഷത്തില്‍ ആര്‍ച്ചുബിഷപ് ഡോ. ജോര്‍ജ് ആന്റ ണിസാമി അധ്യക്ഷത വഹിക്കുകയും സമ്മാന ദാനം നിര്‍വഹിക്കുകയും ചെയ്തു. ആഘോഷങ്ങളുടെ ഭാഗമായി സോളോ ഗാനം, പോസ്റ്റര്‍ നിര്‍മ്മാണം, റീലുകള്‍, ഫോട്ടോഗ്രാഫി എന്നിവയിലെ മത്സരങ്ങള്‍ നടത്തി.

 ഇതോടനുബന്ധിച്ച് വിവിധ ഇടവകകളില്‍ പരിശുദ്ധ മാതാവിന്റെ  തിരുസ്വരൂപ പ്രദക്ഷിണം നടത്തിയിരുന്നു. തീര്‍ത്ഥാടനങ്ങള്‍, നോമ്പുകാല ശുശ്രൂഷകള്‍ കുട്ടികളെയും യുവജനങ്ങളെയും കേന്ദ്രീകരിച്ച് വിവിധ പ്രവര്‍ത്തനങ്ങള്‍ ഈ ഗ്രൂപ്പിന്റെ നേതൃത്വത്തില്‍ നടന്നുവരുന്നു. യൂത്ത് ഡയറക്ടര്‍ ഫാ. റൊണാള്‍ഡ് റിച്ചാര്‍ഡിന്റെ ആത്മീയ നേതൃത്വത്തിലാണ് ടീം പ്രവര്‍ത്തിക്കുന്നത്.