റായ്പുര്‍: ക്രൈസ്തവര്‍ക്കുനേരെയുള്ള അത്രിക്രമങ്ങള്‍ തുടര്‍ക്കഥയായ ഛത്തീസ്ഗഡില്‍ ക്രൈസ്തവ പ്രാര്‍ത്ഥനാ യോഗത്തിനു നേരെ വീണ്ടും തീവ്രഹിന്ദുത്വ സംഘടനയായ ബജ്‌റംഗ്ദളിന്റെ നേതൃത്വത്തില്‍ അക്രമണം. ഛത്തീസ്ഗഡില്‍ ദുര്‍ഗില്‍ ജൂലൈ 25ന് രണ്ട് മലയാളി കന്യാസ്ത്രീകളെ മതപരിവര്‍ത്തനവും മനുഷ്യക്കടത്തും ആരോപിച്ച് കൈയേറ്റം ചെയ്തതിന് നേതൃത്വം നല്‍കിയ ബജ്‌റംഗ്ദള്‍ വനിതാ നേതാവ് ജ്യോതി ശര്‍മ്മയുടെ നേതൃത്വത്തിലായിരുന്നു ഇവിടെയും അക്രമങ്ങള്‍ നടന്നത്.
ഛത്തീസ്ഗഡിലെ ദുര്‍ഗിലുള്ള ഷിലോ പ്രെയര്‍ ടവറില്‍ പ്രാര്‍ത്ഥനാ സമ്മേളനം നടന്നുകൊണ്ടിരിക്കെ ഒരു സംഘം ബജ്‌റംഗ്ദള്‍ പ്രവര്‍ത്തകര്‍ ടവറിന് ചുറ്റുംനടന്ന് മുദ്രാവാക്യം വിളിക്കുകയും സുവിശേഷ പ്രസംഗകരെ മര്‍ദ്ദിക്കുകയും ചെയ്തു എന്നാണ് ആരോപണം. പ്രാര്‍ത്ഥനാ യോഗത്തില്‍ പങ്കെടുത്തിരുന്ന വിശ്വാസികളെ കയ്യേറ്റം ചെയ്യാനും ശ്രമിച്ചു.
നിര്‍ബന്ധിത മതപരിവര്‍ത്തനം നടക്കുന്നു എന്ന ആരോപണമായിരുന്നു പതിവുപോലെ ഇവിടെയും ഉയര്‍ത്തിയത്. പോലീസ് ഇരുവിഭാഗങ്ങള്‍ക്കുമെതിരെ കേസ് എടുത്തു. മതപരിവര്‍ത്തനത്തിന് തെളിവൊന്നും ലഭിച്ചിട്ടില്ലെന്നാണ് ഇപ്പോഴത്തെ പോലീസ് റിപ്പോര്‍ട്ട്.
രാജ്യം മുഴുവന്‍ അപലപിച്ച കന്യാസ്ത്രീകള്‍ക്കെതിരെയുള്ള അതിക്രമം നടത്തിയ ബജ്‌റംഗ്ദള്‍ വീണ്ടും സമാനമായ നിയമവിരുദ്ധ പ്രവൃത്തികളില്‍ ഏര്‍പ്പെടുന്നതിന്റെ കാരണം അവര്‍ക്ക് ലഭിക്കുന്ന രാഷ്ട്രീയ സംരക്ഷണമാണ്.
പ്രാര്‍ത്ഥനാ യോഗത്തിന് പോലീസ് സംരക്ഷണം ഏര്‍പ്പെടുത്തിയിട്ടും ബജ്‌റംഗ്ദള്‍ പ്രവര്‍ത്തകര്‍ പ്രെയര്‍ ടവറിന് പുറത്ത് സുവിശേഷ പ്രസംഗകരെ കയ്യേറ്റം ചെയ്യാന്‍ ശ്രമിക്കുന്നതിന്റെ ദൃശ്യങ്ങള്‍ സോഷ്യല്‍ മീഡിയകളില്‍ പ്രചരിക്കുന്നുണ്ട്.
Leave a Comment
Your email address will not be published. Required fields are marked with *