കറാച്ചി/പാക്കിസ്ഥാന്‍: പാക്കിസ്ഥാനിലെ മരിയാബാദിലുള്ള  പരിശുദ്ധ മറിയത്തിന്റെ ദേശീയ മരിയന്‍ ദേവാലയത്തിലേക്കുള്ള തീര്‍ത്ഥാടനത്തില്‍ പങ്കെടുക്കുന്നതിനിടെ കത്തോലിക്ക വിശ്വാസി അക്രമികളുടെ വെടിയേറ്റ് കൊല്ലപ്പെട്ടു. മോട്ടോര്‍ സൈക്കിളിലെത്തിയ അക്രമികളുടെ സംഘം  വിവാഹിതനും നാല് കുട്ടികളുടെ പിതാവുമായ അഫ്‌സല്‍ മാസിഹിനെ കൊലപ്പെടുത്തുകയായിരുന്നു. തീര്‍ത്ഥാടന സംഘത്തിലുള്ള 16 വയസുള്ള ആണ്‍കുട്ടിക്കും പരിക്കേറ്റിട്ടുണ്ട്.

അഫ്‌സല്‍ മാസിഹ് മറ്റ് 15 വിശ്വാസികളോടൊപ്പം യാത്ര ചെയ്യുന്നതിനിടെയാണ് കൊലപാതകം നടന്നത്. മോട്ടോര്‍ സൈക്കിളുകളില്‍ നിരവധി യുവാക്കള്‍ മിനിബസിനെ സമീപിച്ച് സംഘത്തെ പ്രകോപിപ്പിക്കാന്‍ തുടങ്ങി. തീര്‍ത്ഥാടകര്‍ ദേവാലയത്തില്‍ നിന്ന് 19 മൈല്‍ അകലെയുള്ള ഒരു ഗ്യാസ് സ്റ്റേഷനില്‍ എത്തിയപ്പോള്‍, മുഹമ്മദ് വഖാസ് എന്നയാള്‍ റൈഫിള്‍ ഉപയോഗിച്ച് വെടിയുതിര്‍ക്കുകയും അഫ്‌സല്‍ മാസിഹിന്റെ കഴുത്തിന് വെടിയേല്‍ക്കുകയുമായിരുന്നു. 16 വയസ്സുള്ള അദ്ദേഹത്തിന്റെ ബന്ധുവായ ഹാരിസ് മാസിഹിന്റെ കൈക്കും പരിക്കേറ്റു.

മരിയന്‍ ദേവാലയത്തില്‍ സെപ്റ്റംബര്‍ 5 മുതല്‍ 8 വരെ നടന്ന വാര്‍ഷിക തിരുനാളില്‍ ഏകദേശം 500,000 കത്തോലിക്ക വിശ്വാസികള്‍ പങ്കുചേര്‍ന്നിരുന്നു. 1893 ല്‍ കപ്പൂച്ചിന്‍ മിഷനറിമരാണ് ഇവിടെ ഗ്രോട്ടോയും ദൈവാലയവും സ്ഥാപിച്ചത്. 241 ദശലക്ഷത്തിലധികം ജനസംഖ്യയുള്ള പാകിസ്ഥാനില്‍ 96% ജനങ്ങളും ഇസ്ലാം മതവിശ്വാസികളാണ്. ക്രൈസ്തവര്‍ 1.4% മാത്രമാണുള്ളത്. അതായത് ഏകദേശം 33 ലക്ഷം ആളുകള്‍.