അബുജ/നൈജീരിയ: നൈജീരിയയിലെ എന്‍സുക്ക രൂപത വൈദികനായിരുന്ന ഫാ. മാത്യു ഈയ ഒരു അജപാലനദൗത്യത്തിന് ശേഷം ഇടവകയിലേക്ക് മടങ്ങും വഴി അജ്ഞാതരായ അക്രമികളുടെ വെടിയേറ്റ് കൊല്ലപ്പെട്ടു. എന്‍സുക്ക രൂപതയിലെ സെന്റ് ചാള്‍സ് ഇടവക വികാരിയായിരുന്നു. ഫാ. മാത്യു ഈയയുടെ കൊലപാതകം ‘അര്‍ത്ഥശൂന്യമായ അക്രമ പ്രവൃത്തി’യും ‘ഹീനമായ കുറ്റകൃത്യവു’മാണെന്ന് എന്‍സുക്ക കത്തോലിക്കാ രൂപത അപലപിച്ചു.

സെപ്റ്റംബര്‍ 19 വെള്ളിയാഴ്ച ഉച്ചകഴിഞ്ഞ്  അജപാലന ദൗത്യത്തിന് ശേഷം ഇടവകയിലേക്ക് മടങ്ങുമ്പോഴാണ് ഫാ. മാത്യു വെടിയേറ്റ് കൊല്ലപ്പെട്ടത്.  എളിമയിലൂടെയും തന്റെ അജഗണത്തോടുള്ള അചഞ്ചലമായ പ്രതിബദ്ധതയിലൂടെയും ഫാ. മാത്യു ഈയ വേറിട്ട് നിന്നിരുന്നതായി രൂപതയുടെ കുറിപ്പില്‍ പറയുന്നു.
ബൊക്കോ ഹറാം, ഫുലാനി തീവ്രവാദികള്‍ തുടങ്ങിയ ഇസ്ലാമിക്ക് തീവ്രവാദ ഗ്രൂപ്പുകളുടെ നേതൃത്വത്തില്‍ വൈദികര്‍ക്കും ക്രൈസ്തവര്‍ക്കുമെതിരായ അക്രമങ്ങള്‍ നൈജീരിയയില്‍ ഇപ്പോള്‍ സാധാരണമായിരിക്കുകയാണ്.