മരിക്കുന്നവരെല്ലാം ദൈവത്തെ മുഖാമുഖം ദർശിക്കാൻ തക്ക യോഗ്യതയുള്ളവരായരിക്കുകയില്ല. അതേസമയം ശപിക്കപ്പെട്ട ആത്മാക്കളുടെ ഗണത്തിൽ തള്ളപ്പെടാൻമാത്രം പാപം എല്ലാവരിലും ഉണ്ടായിരിക്കുകയുമില്ല. അതിനാൽ മരിക്കുന്നവർ ചിലർ ദൈവത്തെ സ്‌നേഹിക്കുന്നവരായിരിക്കും. എന്നാൽ അവർ തങ്ങളുടെ പാപങ്ങൾക്ക് പൂർണ പരിഹാരം ചെയ്തിട്ടില്ലെന്നു വരാം. ദൈവത്തിന്റെ കാരുണ്യം അവരെ നിത്യശിക്ഷയിൽനിന്ന് ഒഴിവാക്കുന്നു. അവിടുത്തെ നീതി അവരുടെ വിശുദ്ധീകരണം ആവശ്യപ്പെടുന്നു. സ്വർഗവാസികൾക്ക് പ്രാർത്ഥന ആവശ്യമില്ല. നരകവാസികൾക്ക് പ്രാർത്ഥന പ്രയോജനപ്പെടുകയുമില്ല. നിശ്ചിത കാലത്തെ ശുദ്ധീകരണത്തിനുശേഷം സ്വർഗത്തിലേക്കു പോകാവുന്ന ആത്മാക്കൾക്കുവേണ്ടിയാണ് നാം പ്രാർത്ഥിക്കേണ്ടത്.