ബെല്‍ഫാസ്റ്റ്: നോര്‍ത്തേണ്‍ അയര്‍ലണ്ടിലെ സീറോ മലബാര്‍ കാത്തലിക് സമൂഹം ഒന്നാകെ ഏറ്റെടുത്ത കലയുടെ പകല്‍പ്പൂരമായ ബൈബിള്‍ ഫെസ്റ്റ് ശ്രദ്ധേയമായി. ബെല്‍ ഫാസ്റ്റിലെ ഓള്‍ സെയിന്റ്‌സ് കോളജിലായിരുന്നു ഫെസ്റ്റ് നടന്നത്.
നോര്‍ത്തേണ്‍ അയര്‍ലന്‍ഡിലെ ഏറ്റവും വലിയ മലയാളി കലാമേളയാണ് നൂറുകണക്കിന് ആസ്വാദകര്‍ തിങ്ങിനിറഞ്ഞ സദസില്‍ അവതരിപ്പിക്കപ്പെട്ടത്. ബൈബിള്‍ അധിഷ്ഠിതമാ യിരുന്നു കലാമേളയെങ്കിലും അവതരണ മികവും കലാമൂല്യവും ഉയര്‍ന്നുനിന്നു. പലരും പ്രവാസ ജീവിതത്തിന് മുന്‍പ് അഴിച്ചു വച്ച ചിലങ്കയും ചായവും ഒരിക്കല്‍ കൂടി എടുത്തണിഞ്ഞു. അര ങ്ങിലെത്തിയ കലാകാരികളുടെ മികവാര്‍ന്ന ചുവടുകളും നിരന്തര പരിശീലനം മൂലം നേടിയ ചടുലതയും താളവുംകൊണ്ട് ഒന്നിനൊന്നു മികച്ചുനിന്നു.
ഗാനാലാപന വീഥിയില്‍ വന്നതൊക്കെയും മികവിന്റെ ഈണവും താളവും ശ്രുതിയും ആയിരുന്നു. കുട്ടികളും മുതിര്‍ന്നവരും വിവിധ മല്‍സര ഇനങ്ങളില്‍ പങ്കെടുത്തു. .ചിത്ര രചനയിലും ഏകാഭിനയത്തിലും സര്‍ഗശേഷിയുള്ള കുട്ടികള്‍ മാറ്റുരച്ചു. കൊച്ചു കുട്ടികള്‍ക്കായി നടത്തിയ കളറിംഗില്‍ പോലും പുത്തന്‍ പ്രതിഭകളുടെ സാന്നിധ്യം വിളിച്ചറിയിക്കുന്ന രചനകള്‍ ഉണ്ടായി. സ്‌കിറ്റ് മത്സരത്തില്‍ അവതരിപ്പിക്കപ്പെട്ടവയെല്ലാം സാങ്കേതികത്വവും അഭിനയ ചാരുതയും ആശയ സമ്പുഷ്ടത കൊണ്ടും ചിന്തോദ്ദീപകവും ആസ്വാദ്യകരവുമായിരുന്നു.
പ്രവാസ ജീവിതത്തിലും മലയാള നാടിന്റെ കലയും സംസ്‌കാരവും ഒളിമങ്ങാതെ തെളിമയോടെ കാത്തു സൂക്ഷിക്കുവാന്‍ ഇത്തരം വേദികള്‍ അനിവാര്യമെന്ന് അടിവരയിടുന്നതായിരുന്നു ഈ കലാമേള. കഴിഞ്ഞ പതിനഞ്ചു വര്‍ഷത്തോളമായി നടത്തി വരുന്ന കലയുടെ ഈ മഹോത്സവം ഓരോ വര്‍ഷം ചെല്ലുന്തോറും ഏറേ ജനപ്രിയമായി മാറുന്നു എന്നതാണ് വന്‍ ജനപങ്കാളിത്തം സൂചിപ്പിക്കുന്നത്.
നോര്‍ത്തേണ്‍ അയര്‍ലണ്ടിലെ 7 ഇടവകകളായി പരന്നു കിടക്കുന്ന സീറോ മലബാര്‍ കാത്തലിക് സമൂഹത്തിലെ കലാകാരന്മാരും കലാകാരികളുമായ വിവിധ പ്രായക്കാര്‍ അണിനിരന്ന മേളയില്‍ വിധി കര്‍ത്താക്കളായും പരിശീലകരായും കേരളത്തിലെ സ്‌കൂള്‍-യൂണിവേഴ്‌സിറ്റി യുവജനോത്സവത്തിലെ മുന്‍കാല വിജയികള്‍ അണിനിരന്നതു കലാ മേളയുടെ ഔന്നത്യം വിളിച്ചോതി.
ബല്‍ഫാസ്റ്റ് റീജിയന്‍ കോ-ഓര്‍ഡിനേറ്റര്‍ ഫാ. ജോസ് ഭരണികുളങ്ങര തിരിതെളിച്ച് ഫെസ്റ്റിന് തുടക്കംകുറിച്ചു. ഉദ്ഘാടന ചടങ്ങില്‍ ബൈബിള്‍ ഫെസ്റ്റ് ഡയറക്ടര്‍ ഫ. ജെയിന്‍ മന്നത്തുകാരന്‍, ഫാ. അനീഷ് വഞ്ചിപ്പാറയില്‍, ഫാ. ജോഷി, ഫാ. സജി, ഫാ.ജോ പഴേപറമ്പില്‍, ബൈബിള്‍ ഫെസ്റ്റ് കോ-ഓര്‍ഡിനേറ്റര്‍മാരായ ബാബു ജോസഫ്, രാജു ഡെവി, സണ്‍ഡേ സ്‌കൂള്‍ ഹെഡ്മാസ്റ്റര്‍ കുഞ്ഞുമോന്‍ ഇണ്ടികുഴി, ഷാജി വര്‍ഗീസ്, ആനന്ദ് ജോസഫ്, മോന്‍സി തോമസ്, സോജന്‍ സെബാസ്റ്റ്യന്‍, ജ്യോതിസ് ചെറിയാന്‍ തുടങ്ങിയവര്‍ സംബന്ധിച്ചു.
Leave a Comment
Your email address will not be published. Required fields are marked with *