കട്ടപ്പന: ലഹരിക്കെതിരെ യുവജനങ്ങള്‍ ആത്മീയയുടെ കോട്ട തീര്‍ക്കണമെന്ന് ഇടുക്കി രൂപതാ മെത്രാന്‍ മാര്‍ ജോണ്‍ നെല്ലിക്കുന്നേല്‍. രൂപതയിലെ 11,12 ക്ലാസുകളില്‍ പഠിക്കുന്ന വിദ്യാര്‍ത്ഥികളുടെ നേതൃത്വത്തില്‍ നടന്ന എഴുകുംവയല്‍ കുരിശുമല തീര്‍ത്ഥാടനത്തില്‍ സന്ദേശം നല്‍കുകയായിരുന്നു അദ്ദേഹം.
സമൂഹം ലഹരി എന്ന വലിയ വിപത്തിനെതിരെ പോരാട്ടം നടത്തുന്ന കാലമാണിത്. യുവജനങ്ങള്‍ ലഹരിയുടെ ഉപയോഗത്തിനും വിപണനത്തിനുമെതിരെ ജാഗ്രത പുലര്‍ത്തണമെന്നും അദ്ദേഹം പറഞ്ഞു. ജീവിതത്തിലെ സഹനങ്ങള്‍ രക്ഷയിലേക്കുള്ള ഒറ്റയടി പാതയാണ് എന്ന് പുതുതലമുറയ്ക്ക് ബോധ്യം ഉണ്ടാകുന്നതിനും സഹനങ്ങള്‍ രക്ഷാകരമാണ് എന്ന തിരിച്ചറിവിലേക്ക് അവര്‍ എത്തിച്ചേരുന്നതിനും ഈ തീര്‍ത്ഥാടനം ഉപകരിക്കുമെന്ന് മാര്‍ ജോണ്‍ നെല്ലിക്കുന്നേല്‍ പറഞ്ഞു.
സമൂഹത്തെ ഗൗരവമായി ബാധിച്ചിരിക്കുന്ന ലഹരിയുടെ പിടിയില്‍ നിന്നും പുതുതലമുറ മാറി ചിന്തിക്കുന്നതിനും ത്യാഗം സഹിച്ചുള്ള ആത്മീയ ശീലങ്ങള്‍ ജീവിതത്തിന്റെ പുതു ലഹരിയായി രൂപാന്തരപ്പെടുന്നതിനും ഇത്തരം തീര്‍ത്ഥാടനം വഴിയൊരുക്കുമെന്ന് അദ്ദേഹം പറഞ്ഞു.
എഴുകുംവയല്‍ നിത്യസഹായമാതാ പള്ളിയില്‍ നടന്ന ദിവ്യകാരുണ്യ ആരാധനക്ക് മാര്‍ ജോണ്‍ നെല്ലിക്കുന്നേല്‍ നേതൃത്വം നല്‍കി. തുടര്‍ന്ന് നടന്ന പരിഹാര പ്രദക്ഷിണത്തില്‍ വിവിധ ഇടവകകളില്‍ നിന്നും നൂറുകണക്കിന് വിദ്യാര്‍ത്ഥികള്‍ പങ്കെടുത്തു. എഴുകുംവയല്‍ കപ്പേളയില്‍ല്‍ പരിഹാരപ്രദക്ഷിണം എത്തിച്ചേര്‍ന്നപ്പോള്‍ മാര്‍ നെല്ലിക്കുന്നേല്‍ കുട്ടികള്‍ക്ക് ലഹരി വിരുദ്ധ പ്രതിജ്ഞ ചെല്ലി കൊടുത്തു.
തുടര്‍ന്ന് കുരിശിന്റെ വഴി പ്രാര്‍ത്ഥന ചെല്ലി കുരിശുമല തീര്‍ത്ഥാടനം നടന്നു. ലഹരി വിമുക്ത സമൂഹത്തിനും ലഹരിക്ക് അടിമകളാക്കുകയും ലഹരിയുടെ വിപണനം നടത്തുകയും ചെയ്യുന്നവരുടെ മാനസാന്തരവുമായിരുന്നു തീര്‍ത്ഥാടനത്തിന്റെ പ്രധാന നിയോഗം.
മലമുകളില്‍ നടന്ന വിശുദ്ധ കുര്‍ബാനക്ക് മാര്‍ ജോണ്‍ നെല്ലിക്കുന്നേല്‍ മുഖ്യകാര്‍മ്മികത്വം വഹിച്ചു. രൂപതാ മുഖ്യ വികാരി ജനറാള്‍ മോണ്‍. ജോസ് കരിവേലിക്കല്‍, ഫാ. ജോസഫ് നടുപ്പടവില്‍, ഫാ. അമല്‍ മണിമലക്കുന്നേല്‍, ഫാ. അലക്‌സ് ചേന്നംകുളം എന്നിവര്‍ സഹകാര്‍മ്മികരായി.
തീര്‍ത്ഥാടന കേന്ദ്രം റെക്ടര്‍ ഫാ. തോമസ് വട്ടമല, ഫാ. ജിന്‍സ് കാരയ്ക്കാട്ട്, ഫാ. ലിബിന്‍ വള്ളിയാംതടത്തില്‍, സാം സണ്ണി, സെസില്‍ ജോസ് എന്നിവര്‍ നേതൃത്വം നല്‍കി.
Leave a Comment
Your email address will not be published. Required fields are marked with *