ലണ്ടന്‍: ആധുനിക കത്തോലിക്ക സഭയുടെ ചരിത്രത്തില്‍ ആദ്യമായി, യുകെയിലെ അപ്പസ്‌തോലിക് ന്യൂണ്‍ഷ്യോ ആംഗ്ലിക്കന്‍ കാന്റബറി കത്തീഡ്രലില്‍ ദിവ്യബലി അര്‍പ്പിച്ചു. യുകെയിലെ സഭയിലേക്കുള്ള ലിയോ പാപ്പയുടെ പ്രതിനിധിയായ അപ്പസ്‌തോലിക് നുണ്‍ഷ്യോ, ആര്‍ച്ചുബിഷപ് മിഗുവല്‍ മൗറി ബുവെന്‍ഡിയയാണ് കത്തോലിക്ക സഭയും ആംഗ്ലിക്കന്‍ സഭയും വിശുദ്ധനായി വണങ്ങുന്ന വിശുദ്ധ തോസ് ബെക്കറ്റിന്റെ ഭൗതികാവശിഷ്ടം കത്തീഡ്രലിലേക്ക് മാറ്റിയ തിരുനാളിനോടനുബന്ധിച്ച് കാന്റബറി കത്തീഡ്രലില്‍ ദിവ്യബലിയര്‍പ്പിച്ചത്.

1162 മുതല്‍ 1170-ല്‍  കാന്റബറിയിലെ ആര്‍ച്ചുബിഷപ്പായിരുന്നു തോമസ് ബെക്കറ്റ് എന്നറിയപ്പെടുന്ന വിശുദ്ധന്‍.  ഹെന്റി രണ്ടാമന്‍ രാജാവുമായി സഭയുടെ അവകാശങ്ങളെയും പദവികളെയും ചൊല്ലിയുണ്ടായ തര്‍ക്കത്തെ തുടര്‍ന്ന് അദ്ദേഹത്തിന്റെ അനുയായികള്‍ ആര്‍ച്ചുബിഷപ്പിനെ കൊലപ്പെടുത്തുകയായിരുന്നു. മരണശേഷം ഉടന്‍ തന്നെ അലക്‌സാണ്ടര്‍ മൂന്നാമന്‍ പാപ്പ അദ്ദേഹത്തെ വിശുദ്ധനായി പ്രഖ്യാപിച്ചു. ആംഗ്ലിക്കന്‍ സഭയും കത്തോലിക്കാ സഭയും അദ്ദേഹത്തെ വിശുദ്ധനായും രക്തസാക്ഷിയായും ആദരിക്കുന്നു. 1220-ല്‍, തോമസ് ബെക്കറ്റിന്റെ മൃതദേഹം കാന്റബറി കത്തീഡ്രലിന്റെ സെമിത്തേരിയില്‍നിന്ന് നിന്ന് പ്രധാന അള്‍ത്താരയ്ക്ക് പിന്നിലുള്ള ചാപ്പലിലേക്ക് മാറ്റിയതിന്റെ തിരുനാളാണ് ജൂലൈ ഏഴിന് ആഘോഷിക്കുന്നത്. 1538-ല്‍ ഹെന്റി എട്ടാമന്‍ ഈ മൃതകുടീരം നശിപ്പിക്കാന്‍ ഉത്തരവിട്ടു.

വര്‍ഷത്തിലൊരിക്കല്‍, ജൂലൈ 7 ന്, വിശുദ്ധ തോമസ് ബെക്കറ്റിന്റെ ബഹുമാനാര്‍ത്ഥം കാന്റബറിയിലെ സെന്റ് തോമസ് കത്തോലിക്കാ ഇടവക, കാന്റബറി കത്തീഡ്രലില്‍ ദിവ്യബലിയര്‍പ്പിച്ചു വരുന്നു.  പ്രശസ്തമായ ഈ ആംഗ്ലിക്കന്‍ കത്തീഡ്രലില്‍ നിരവധി കത്തോലിക്കാ ദിവ്യബലികള്‍ നടന്നിട്ടുണ്ടെങ്കിലും, ആദ്യമായാണ് ഒരു പേപ്പല്‍ ന്യൂണ്‍ഷ്യോ ഇവിടെ ദിവ്യബലി അര്‍പ്പിക്കുന്നത്. കത്തോലിക്ക സഭയും ആംഗ്ലിക്കന്‍ സഭയും കൂടുതല്‍ രമ്യതയിലേക്ക് വരുന്നതിന്റെ സൂചന കൂടെയായി ഈ നടപടി കരുതപ്പെടുന്നു.

2025 പ്രത്യാശയുടെ ജൂബിലി വര്‍ഷത്തിന്റെ പശ്ചാത്തലത്തിലാണ് ഈ കുര്‍ബാനയര്‍പ്പണം നടത്തിയതെന്ന് പേപ്പല്‍ നൂണ്‍ഷ്യോ ആര്‍ച്ചുബിഷപ് മിഗുവല്‍ ദിവ്യബലിമധ്യേ നടത്തിയ പ്രസംഗത്തില്‍ പറഞ്ഞു. വിശുദ്ധ തോമസ് ബെക്കറ്റിന്റെ കാലത്ത് എന്നപോലെ ഇന്നും നമ്മുടെ ലോകത്തിന് പ്രത്യാശ ആവശ്യമാണ്. വിശുദ്ധ തോമസിന്റെ വിശുദ്ധിയാലും ക്രിസ്തുവിനെയും അവിടുത്തെ സഭയെയും കുറിച്ചുള്ള അദ്ദേഹത്തിന്റെ ധീരമായ സാക്ഷ്യത്താലും പ്രചോദിതരാകാന്‍ ‘പ്രതീക്ഷയുടെ തീര്‍ത്ഥാടകരായാണ്’ ഈ ജൂബിലി വര്‍ഷത്തില്‍ ഇവിടെക്ക് വരുന്നതെന്നും ആര്‍ച്ചുബിഷപ് കൂട്ടിച്ചേര്‍ത്തു.