കോട്ടപ്പുറം: ഈശോമിശിഹായുടെ മനുഷ്യാവതാര ജൂബിലി 2025 ന്റെ കോട്ടപ്പുറം രൂപതാതല സമാപനം ഡിസംബര്‍ 28 ന് കോട്ടപ്പുറം സെന്റ് മൈക്കിള്‍സ് കത്തീഡ്രലില്‍ നടക്കും. വൈകുന്നേരം അഞ്ചിന് നടക്കുന്ന ജൂബിലി സമാപന പൊന്തിഫിക്കല്‍ ദിവ്യബലിക്ക് കോട്ടപ്പുറം ബിഷപ് ഡോ. അംബ്രോസ് പുത്തന്‍വീട്ടില്‍ മുഖ്യകാര്‍മ്മികത്വം വഹിക്കും. രൂപതയിലെ എല്ലാ വൈദികരും സഹകാര്‍മ്മികരാകും.

 ഇതിന് മുന്നോടിയായി വൈകുന്നേരം മൂന്നിന് കൊടുങ്ങല്ലൂര്‍ ബോയ്‌സ് സ്‌കൂള്‍ പരിസരത്തു നിന്നും കൃഷ്ണന്‍കോട്ട ക്രിസ്തുരാജ ദേവാലയത്തില്‍ നിന്നും തുരുത്തിപ്പുറം സെന്റ് ഫ്രാന്‍സിസ് അസീസി ദേവാലയത്തില്‍ നിന്നുമായി കത്തീഡ്രലിലേക്ക് ജൂബിലി പദയാത്രകള്‍  നടക്കും.

 കൃഷ്ണന്‍കോട്ടയില്‍നിന്ന് ജൂബിലി കുരിശും കൊടുങ്ങ ല്ലൂരില്‍നിന്ന് ബൈബിളും ജൂബിലി പതാകയും തുരുത്തിപ്പുറത്തു നിന്ന് ജൂബിലി എംബ്ലവും വഹിച്ചായിരിക്കും പദയാത്ര. ക്രിസ്തീയ കലാരൂപങ്ങളുടെ അകമ്പടിയും നിശ്ചല ദൃശ്യങ്ങളുമായി ഇടവകകളുടെ ബാനറിനു പിന്നിലായി പേപ്പല്‍ പതാകകളുമായി ആയിരങ്ങള്‍ അണിചേരുന്ന പദയാത്രയില്‍ ജപമാല ചൊല്ലി വിശ്വാസീ സമൂഹം പങ്കെടുക്കും.

ക്രിസ്തീയ വിശ്വാസത്തിന്റെ പിള്ളത്തൊട്ടിലായ കൊടുങ്ങ ല്ലൂര്‍-കോട്ടപ്പുറത്ത് വൈകുന്നേരം 4.30 ന്  എത്തുന്ന പദയാത്രകള്‍ക്ക് കത്തീഡ്രല്‍ കവാടത്തില്‍ വരവേല്പ് നല്‍കും. വിശ്വാസപരിശീലന കേന്ദ്രത്തിന്റെ നേതൃത്വത്തില്‍ ബൈബി ളിലെ ഉല്‍പ്പത്തി പുസ്തകം പകര്‍ത്തിയെഴുതിയ രണ്ടായിരം പേരുടെ സംഗമം ഇതോടനുബന്ധിച്ച് സംഘടിപ്പിച്ചിട്ടുണ്ട്.

 കെസിബിസി ബൈബിള്‍ മാസാചരണത്തിന്റെ സമാപനവും  നടക്കും. ജൂബിലി സമാപനവുമായി ബന്ധപ്പെട്ട് ജൂബിലി കോ-ഓര്‍ഡിനേറ്റര്‍ ഫാ. നിമേഷ് കാട്ടാശ്ശേരിയുടെയും ഫൊറോന വികാരിമാരുടെയും നേതൃത്വത്തില്‍ വിവിധ കമ്മിറ്റികള്‍ ഊര്‍ജ്ജിതമായി പ്രവര്‍ത്തിച്ചുവരുന്നു.