കോഴിക്കോട്: ശാന്തിയുടെയും സമാധാനത്തിന്റെയും സന്ദേശവുമായി കോഴിക്കോട് നഗരത്തിന് പുതുമയുള്ള കാഴ്ചകള്‍ സമ്മാനിച്ച് കോഴിക്കോട് രൂപത സംഘടിപ്പിച്ച പ്രഥമ ‘ഫെലിക്‌സ് നതാലിസ്’ മഹാക്രിസ്മസ് ഘോഷയാത്ര ശ്രദ്ധേയമായി.
കോഴിക്കോട് സിറ്റി സെന്റ് ജോസഫ് ദൈവാലയത്തില്‍ നിന്ന് ആരംഭിച്ച ഘോഷയാത്ര, രാത്രി ഏഴോടെ ബീച്ച് ഫ്രീഡം സ്‌ക്വയറില്‍ സമാപിച്ചു. ആയിരത്തിലധികം ക്രിസ്മസ് പാപ്പമാരാണ് കോഴിക്കോടിനെ ഇളക്കിമറിച്ച മഹാക്രിസ്മസ് ഘോഷയാത്രയില്‍ അണിനിരന്നത്.
സെന്റ് ജോസഫ് ദൈവാലയ അങ്കണത്തില്‍ കോഴിക്കോട് രൂപതാധ്യക്ഷന്‍ ഡോ. വര്‍ഗീസ് ചക്കാലയ്ക്കല്‍ സമാധാനത്തിന്റെ സന്ദേശമായ പ്രാവുകളെ പറപ്പിച്ചാണ് ഘോഷയാത്രയ്ക്കു തുടക്കംകുറിച്ചത്. മാനവികതയെ വിണ്ണില്‍നിന്നും മണ്ണിലേക്ക് ഉയര്‍ത്തുവനാണ് ക്രിസ്തു ജനിച്ചത്. അതു കൊണ്ടുതന്നെ സകലരും ജാതി മതഭേദമന്യേ അംഗീകരിക്കുന്ന ഒരു സ്‌നേഹ സന്ദേശമാണ് ക്രിസ്തുവില്‍ ഉള്ളതെന്ന് ഡോ. ചക്കാലയ്ക്കല്‍ പറഞ്ഞു.
കോഴിക്കോട് രൂപതയുടെ മീഡിയ സെന്ററായ പാക്‌സ് കമ്മ്യൂണിക്കേഷന്‍സ് സംഘടിപ്പിച്ച ഫ്‌ളാഷ്‌മോബ് ഉദ്ഘാടനച്ചടങ്ങിന് പകിട്ടേകി. സെന്റ് ജോസഫ് ദൈവാലയത്തില്‍നിന്നും വയനാട് റോഡ് വഴി സിഎച്ച് ഓവര്‍ബ്രിഡ്ജിലൂടെയാണ് ക്രിസ്മസ് ഘോഷയാത്ര സമാപന വേദിയായ ബീച്ച് ഫ്രീഡം സ്‌ക്വയറില്‍ എത്തിയത്.
സമാപന സമ്മേളനം കോഴിക്കോട് മേയര്‍ ബീന ഫിലിപ്പ് ഉദ്ഘാടനം ചെയ്തു. ബിഷപ് ഡോ. വര്‍ഗീസ് ചക്കാലയ്ക്കല്‍ അധ്യക്ഷത വഹിച്ചു. സമാപന സമ്മേളനം വര്‍ണശബളമാക്കി പാക്‌സ് കമ്മ്യൂണിക്കേഷന്‍സിന്റെ നേതൃത്വത്തില്‍ തീംസോംഗ് പ്രസന്റേഷനും മേരിക്കുന്ന നിര്‍മല നഴ്‌സിംഗ് സ്‌കൂളും പ്രോവിഡന്‍സ് കോളജും സംയ്കുതമായി അവതരിപ്പിച്ച ഫ്യൂഷന്‍ ഡാന്‍സും നാടകവും അരങ്ങേറി.
സമാധാനത്തിന്റെയും ശാന്തിയുടെയും സന്ദേശം പേറുന്ന ക്രിസ്മസ് ഘോഷയാത്ര വന്‍വിജയമായ സാഹചര്യത്തില്‍, കൂടുതല്‍ ആഘോഷപരിപാടികളുമായി വരും വര്‍ഷങ്ങളിലും തുടരുമെന്ന് ബിഷപ് ഡോ. ചക്കാലയ്ക്കല്‍ പിതാവ് പറഞ്ഞു. രൂപതാ വികാരി ജനറല്‍ മോണ്‍. ജെന്‍സണ്‍ പുത്തന്‍ വീട്ടില്‍, നേതൃത്വം നല്‍കി. ഫാ. ജെറോം ചിങ്ങന്തറ ചടങ്ങിന് നന്ദി അര്‍പ്പിച്ചു.
Leave a Comment
Your email address will not be published. Required fields are marked with *