കാഞ്ഞിരപ്പള്ളി : കാഞ്ഞിരപ്പള്ളി രൂപത ചെറുപുഷ്പ മിഷന്‍ ലീഗിന്റെ നേതൃത്വത്തില്‍ നിലയ്ക്കല്‍ തീര്‍ത്ഥാടനം നടത്തി. തുലാപ്പള്ളി പള്ളിയിലേക്ക് കാഞ്ഞിരപ്പള്ളി രൂപതയിലെ വിവിധ ഇടവകകളില്‍നിന്നെത്തിയ കുഞ്ഞുമിഷനറിമാര്‍ നടത്തിയ വിശ്വാസപ്രഘോഷണ റാലി തുലാപ്പള്ളി മാര്‍ത്തോമാശ്ലീഹാ പള്ളി വികാരി ഫാ. ജോസഫ് തട്ടാംപറമ്പില്‍ ഫ്‌ളാഗ് ഓഫ് ചെയ്തു. രൂപത മിഷന്‍ ലീഗ് ജോയിന്റ് സെക്രട്ടറി ദിയ പള്ളിവാതുക്കല്‍ പതാക ഏറ്റുവാങ്ങി.
തീര്‍ത്ഥാടകര്‍ തുലാപ്പള്ളി മാര്‍ത്തോമാ ശ്ലീഹാ പ്പള്ളിയില്‍ എത്തി തിരുശേഷിപ്പ് വണക്കം നടത്തി. പത്ത് മണിക്ക് കാഞ്ഞിരപ്പള്ളി രൂപതയിലെ നവവൈദികര്‍ വിശുദ്ധ കുര്‍ബാന അര്‍പ്പിച്ചു. കാഞ്ഞിരപ്പള്ളി രൂപതാ മെത്രാന്‍ മാര്‍ ജോസ് പുളിക്കല്‍ തീര്‍ത്ഥാടന സന്ദേശം നല്‍കി.
വിശുദ്ധ കുര്‍ബാനയ്ക്കു ശേഷം തീര്‍ത്ഥാടകര്‍ നിലയ്ക്കല്‍ എക്യുമിനിക്കല്‍ പള്ളിയിലേക്ക് ജപമാല റാലി നടത്തി. ആയിരക്കണക്കിന് മിഷന്‍ ലീഗ് അംഗങ്ങളും അധ്യാപകരും ഭക്തിപുരസ്സരം പങ്കെടുത്ത ഈ റാലി നിലയ്ക്കല്‍ എക്യുമെനിക്കല്‍ പള്ളിയില്‍ എത്തിച്ചേര്‍ന്നപ്പോള്‍ നിലയ്ക്കല്‍ എക്യുമെനിക്കല്‍ പള്ളി അഡ്മിനിസ്‌ട്രേറ്റര്‍ ഫാ. ഷൈജു മാത്യു ഒഐസി സമാപന പ്രാര്‍ത്ഥന നടത്തി.
കാഞ്ഞിരപ്പള്ളി രൂപതയിലെ മാതൃകാ മദ്ബഹാ ശുശ്രൂഷകര്‍ക്കുള്ള ഫാ.ജോര്‍ജ് കാപ്പിലിപ്പറമ്പില്‍ മെമ്മോറിയല്‍ എവര്‍ റോളിങ്ങ് ട്രോഫിയും, ക്യാഷ് അവാര്‍ഡും നിലയ്ക്കല്‍ പള്ളിയില്‍ വച്ച് ഫാ. ഷൈജു മാത്യു ഒഐസി വിതരണം ചെയ്തു. കട്ടപ്പന സെന്റ് ജോര്‍ജ് ഫൊറോന, മുക്കൂട്ടുതറ സെന്റ് തോമസ്, ശാന്തിഗിരി സെന്റ് ജോര്‍ജ് എന്നീ ഇടവകകള്‍ സമ്മാനങ്ങള്‍ കരസ്ഥമാക്കി.
മിഷന്‍ ലീഗ് രൂപത, ഫൊറോന, ഇടവക ഭാരവാഹികളും തുലാപ്പള്ളി, സീതത്തോട് ഇടവകാംഗങ്ങളും തീര്‍ത്ഥാടനത്തിന് നേതൃത്വം നല്‍കി.
Leave a Comment
Your email address will not be published. Required fields are marked with *