ഇടുക്കി: ആഗോള സമര്‍പ്പിത ദിനാചരണത്തിന്റെ ഭാഗമായി വാഴത്തോപ്പില്‍ നടത്തിയ ഇടുക്കി രൂപതാ സമര്‍പ്പിത ദിനാഘോഷം ഇടുക്കി രൂപതാധ്യക്ഷന്‍ മാര്‍ ജോണ്‍ നെല്ലിക്കുന്നേല്‍ ഉദ്ഘാടനം ചെയ്തു. ആതുര ശുശ്രൂഷ മേഖലയിലും വിദ്യാഭ്യാസ മേഖലയിലും സാമൂഹിക ക്ഷേമപ്രവര്‍ത്തന മേഖലയിലും സമര്‍പ്പിതര്‍ നല്‍കിയ സേവനങ്ങള്‍ ലോകത്തിന്റെ വിവിധ മേഖലകളിലുള്ള വളര്‍ച്ചയ്ക്ക് കാരണമായിട്ടുണ്ടെന്ന് അദ്ദേഹം പറഞ്ഞു. ഭാരതത്തിലും വിശിഷ്യാ കേരളത്തിലും പൊതുസമൂഹത്തിന്റെ സമഗ്ര വളര്‍ച്ചക്കും സഭയുടെ സര്‍വ്വതോന്മുഖമായ പുരോഗതി ക്കും സമര്‍പ്പിത സംഭാവനകള്‍ പ്രശംസനീയമാണന്നും മാര്‍ നെല്ലിക്കുന്നേല്‍ കൂട്ടിച്ചേര്‍ത്തു.
ഇടുക്കി രൂപതയില്‍ ശുശ്രൂഷ ചെയ്യുന്ന 32 വ്യത്യസ്ത സന്യാസിനീ സമൂഹങ്ങളില്‍ അംഗങ്ങളായ സമര്‍പ്പിതര്‍ വാഴത്തോപ്പ് സെന്റ് ജോര്‍ജ് കത്തീഡ്രല്‍ പള്ളിയില്‍ സംഗമിച്ചു. രാവിലെ 9.15ന് പാരീഷ് ഹാളില്‍ നിന്നും ആരംഭിച്ച പ്രദക്ഷിണത്തോടെയാണ് സമര്‍പ്പിത സംഗമം ആരംഭിച്ചത്. പ്രദക്ഷിണത്തില്‍ അള്‍ത്താര ബാലസംഘവും മാലാഖ വേഷധാരികളായ കുട്ടികളും സമര്‍പ്പിതര്‍ക്ക് ആശംസകള്‍ അര്‍പ്പിച്ചുകൊണ്ട് വിവിധ ഭക്തസംഘടനകളുടെ പ്രതിനിധികളും അണിനിരന്നു.
പ്രദക്ഷിണത്തിന്റെ അവസാനം ദേവാലയത്തില്‍ പ്രതിഷ്ഠിച്ചിരുന്ന ജൂബിലി കുരിശിന് മുമ്പില്‍ തങ്ങളെത്തന്നെ സമര്‍പ്പിക്കുന്നതിന്റെ ഭാഗമായി പുഷ്പങ്ങള്‍ അര്‍പ്പിച്ചാണ് സമര്‍പ്പിതര്‍ ദേവാലയത്തിലേക്ക് പ്രവേശിച്ചത്. തുടര്‍ന്ന് 32 സന്യാസിനി സമൂഹങ്ങളുടെയും പ്രതിനിധികള്‍ കാഴ്ച സമര്‍പ്പണം നടത്തി. തുടര്‍ന്ന് നടന്ന ആഘോഷമായ വിശുദ്ധ കുര്‍ബാനയ്ക്ക് രൂപതാ മെത്രാന്‍ മാര്‍ ജോണ്‍ നെല്ലിക്കുന്നേല്‍ മുഖ്യ കാര്‍മികത്വം വഹിച്ചു. രൂപതാ വികാരി ജനറാള്‍മാരായ മോണ്‍. ജോസ് കരിവേലിക്കല്‍, മോണ്‍. ജോസ് പ്ലാച്ചിക്കല്‍, മോണ്‍. അബ്രഹാം പുറയാറ്റ് എന്നിവര്‍ സഹകാര്‍മികരായി. വിശുദ്ധ കുര്‍ബാനയ്ക്ക് ശേഷം സമര്‍പ്പിതരുടെ വൃതവാഗ്ദാന നവീകരണവും നടത്തി.
തുടര്‍ന്നു നടന്ന പൊതുസമ്മേളനം മാര്‍ ജോണ്‍ നെല്ലിക്കുന്നേല്‍ ഉദ്ഘാടനം ചെയ്തു. അഡ്വ. സിസ്റ്റര്‍ ജോസിയ എസ്.ഡി മുഖ്യപ്രഭാഷണം നടത്തി. വിവിധ മേഖലകളില്‍ ശ്രദ്ധേയമായ സംഭാവനകള്‍ നല്‍കിയ സിസ്റ്റര്‍ ജ്യോതിസ് സിഎസ്എന്‍, സിസ്റ്റര്‍ റെജി പന്തലാനി എസ്എബിഎസ്, സിസ്റ്റര്‍ മേമ്പിള്‍ സിഎംസി, സിസ്റ്റര്‍ ലീജ എസ്.ഡി, സിസ്റ്റര്‍ ഡോ. ഡെനി എസ്.എച്ച്, എന്നിവര്‍ക്കും അനാവിം സെന്റര്‍ മുരിക്കാശേരി, ദൈവദാന്‍ സെന്റര്‍ തങ്കമണി എന്നീ സ്ഥാപനങ്ങള്‍ക്കും അവാര്‍ഡുകള്‍ നല്‍കി ആദരിച്ചു.
രൂപത പാസ്റ്റര്‍ കൗണ്‍സില്‍ സെക്രട്ടറി ജോര്‍ജ് കോയിക്കല്‍, ഫാ. മാത്യു അഴകനാക്കുന്നേല്‍, ഫാ. ഫിലിപ്പ് ഐക്കര, ഫാ. ജിന്‍സ് കാരയ്ക്കാട്ട്, സിസ്റ്റര്‍ പ്രദീപാ സിഎംസി, സിസ്റ്റര്‍ ലിറ്റി ഉപ്പുമാക്കല്‍ എസ്എബിഎസ്, സിസ്റ്റര്‍ റോസ്ലിന്‍ എഫ്‌സിസി, സിസ്റ്റര്‍ ടെസ്ലിന്‍ എസ്.എച്ച്, എന്നിവര്‍ നേതൃത്വം നല്‍കി.
Leave a Comment
Your email address will not be published. Required fields are marked with *