മെല്‍ബണ്‍: സെന്റ് തോമസ് സീറോ മലബാര്‍ മെല്‍ബണ്‍ രൂപതയുടെ നേതൃത്വത്തില്‍ സംഘടിപ്പിക്കുന്ന യുവജന കണ്‍വെന്‍ഷന്‍  ‘യുണൈറ്റ് 2025’ ഫെബ്രുവരി 6 മുതല്‍ 9 വരെ മെല്‍ബണിലെ ബെല്‍ഗ്രൈവ് ഹൈറ്റ്സ് കണ്‍വെന്‍ഷന്‍ സെന്ററില്‍ നടക്കും.

രൂപതയിലെ വിവിധ ഇടവകകളില്‍ നിന്നും മിഷനുകളില്‍ നിന്നുമായി 600 ഓളം യുവജനങ്ങള്‍ നാലു ദിവസങ്ങളിലായി നടക്കുന്ന കണ്‍വെന്‍ഷനില്‍ പങ്കെടുക്കും.  പിള്‍ഗ്രിംസ് ഓഫ് ഹോപ് (പ്രതീക്ഷയുടെ തീര്‍ത്ഥാടകര്‍) എന്ന ആപ്തവാക്യത്തില്‍ ഏകോപിപ്പിച്ചിരിക്കുന്ന യുവജന കണ്‍വെന്‍ഷനില്‍ 18-30 പ്രായപരിധിയിലുള്ള യുവജനങ്ങളാണ് പങ്കെടുക്കുന്നത്.

മെല്‍ബണ്‍ സീറോ മലബാര്‍ രൂപത ബിഷപ് മാര്‍ ജോണ്‍ പനംതോട്ടത്തില്‍ യുണൈറ്റ് 2025 ഉദ്ഘാടനം ചെയ്യും. മെല്‍ബണ്‍ അതിരൂപത ആര്‍ച്ചുബിഷപ്പ് പീറ്റര്‍ കൊമന്‍സൊലി  മുഖ്യ പ്രഭാഷണം നടത്തും. അന്താരാഷ്ട്ര തലത്തില്‍ അറിയപ്പെടുന്ന പ്രസംഗകരായ മാറ്റ് ആന്റ് ക്യാമറണ്‍ ഫ്രാഡ്, ഷാര്‍ബെല്‍ റൈഷ്, ജോ ഹേയ്സ് തുടങ്ങിയവര്‍ വിവിധ വിഷയങ്ങളില്‍ ക്ലാസുകള്‍ നയിക്കും.

മെല്‍ബണിലെ ഉക്രെയ്ന്‍ രൂപത ബിഷപ് കര്‍ദിനാള്‍ മൈകോല ബൈച്ചോക്ക് ക്രിസ്തീയ വിശ്വാസത്തെ കുറിച്ചുള്ള സന്ദേശം പങ്കുവയ്ക്കും. സിജോയ് വര്‍ഗീസ്, ബ്രെന്‍ഡന്‍ മലോണ്‍, ഫാ. മെല്‍വിന്‍ മംഗലത്ത് എന്നിവരുടെ നേതൃത്വത്തില്‍ പൊതുവര്‍ക്ക്ഷോപ്പുകളും സംവാദങ്ങളും ഉണ്ടാകും.

നോര്‍ത്തേണ്‍ ടെറിട്ടറിയിലെ മലയാളി മന്ത്രി ജിന്‍സണ്‍ ആന്റോ ചാള്‍സ്, ട്രൂഡി ഡാന്റീസ് എന്നിവരും വിവിധ ക്ലാസുകള്‍ നയിക്കും. ക്രിസ്തീയ ലൈവ് സംഗീത ബാന്‍ഡുകളും ടീം ബില്‍ഡിങ്ങ് ഇവന്റുകളും ടാലന്റ് ഷോകളും യുണൈറ്റ് 2025 ന്റെ ഭാഗമായിട്ടുണ്ട്.

മെല്‍ബണ്‍ സീറോ മലബാര്‍ രൂപതാ വികാരി ജനറാള്‍ മോണ്‍. ഫ്രാന്‍സിസ് കോലഞ്ചേരി, യൂത്ത് അപ്പൊസ്റ്റലേറ്റ് ഡയറക്ടര്‍ സോജിന്‍ സെബാസ്റ്റ്യന്‍, യുണൈറ്റ് 2025 കോ-ഓര്‍ഡിനേറ്റര്‍ അലന്‍ ക്രിസ്റ്റി എന്നിവരുടെ നേതൃത്വത്തില്‍ വിവിധ കമ്മിറ്റികള്‍ യുവജന സമ്മേളനം മികവുറ്റതാക്കാന്‍ നേതൃത്വം നല്‍കുന്നു.