പത്തനംതിട്ട: 9 മുതല്‍ 16 വരെ മാരാമണ്‍ മണല്‍പുറത്തെ പന്തലില്‍ നടക്കുന്ന മാരാമണ്‍ കണ്‍വന്‍ഷന്റെ 130-ാമത് യോഗത്തിന്റെ തയാറെടുപ്പുകള്‍ അവസാനഘട്ടത്തില്‍. 9 ന് 2.30ന് ഡോ. തിയഡോഷ്യസ് മാര്‍ത്തോമ്മാ മെത്രാപ്പൊലീത്ത ഉദ്ഘാടനം ചെയ്യും. സുവിശേഷ പ്രസംഗ സംഘം പ്രസിഡന്റ് ഡോ. ഐസക് മാര്‍ പീലക്‌സിനോസ് അധ്യക്ഷത വഹിക്കും. സഭകളുടെ ലോക കൗണ്‍സില്‍ ജനറല്‍ സെക്രട്ടറി റവ. ഡോ. ജെറി പിള്ളൈ (സ്വിറ്റ്‌സര്‍ലന്‍ഡ്), കൊളംബിയ തിയളോജിക്കല്‍ സെമിനാരി പ്രസിഡന്റ് റവ. ഡോ. വിക്ടര്‍ അലോയോ, ഡോ. രാജ്കുമാര്‍ രാംചന്ദ്രന്‍ (ഡല്‍ഹി) എന്നിവരാണ് മുഖ്യപ്രസംഗകര്‍. തിങ്കള്‍ മുതല്‍ ശനി വരെ രാവിലെ 7.30 മുതല്‍ 8.30 വരെ ബൈബിള്‍ ക്ലാസുകള്‍ കണ്‍വന്‍ഷന്‍ പന്തലിലും കുട്ടികള്‍ക്കുള്ള യോഗം സിഎസ്എസ്എമ്മിന്റെ നേതൃത്വത്തില്‍ കുട്ടിപ്പന്തലിലും നടക്കും.

തിങ്കള്‍, ചൊവ്വ ദിവസങ്ങളില്‍ 2.30 ന് കുടുംബവേദി യോഗങ്ങള്‍. ദിവസവും സായാഹ്ന യോഗങ്ങള്‍ വൈകിട്ട് 6 ന് ഗാനശുശ്രൂഷയോടുകൂടി ആരംഭിച്ച് 7.30 ന് സമാപിക്കും. 12 ന് 9.30ന് എക്യുമെനിക്കല്‍ സമ്മേളനത്തില്‍ വിവിധ സഭാധ്യക്ഷന്മാര്‍ പങ്കെടുക്കും. ഡോ. ജെറി പിള്ളൈ മുഖ്യസന്ദേശം നല്‍കും. ഉച്ചകഴിഞ്ഞ് ലഹരിവി മോചന സമ്മേളനത്തില്‍ മേജര്‍ ആര്‍ച്ചുബിഷപ് മാര്‍ റാഫേല്‍ തട്ടില്‍ മുഖ്യസന്ദേശം നല്‍കും. വൈകിട്ട് 6 ന് സാമൂഹിക തിന്മകള്‍ക്കെതിരെയുള്ള പ്രത്യേക സമ്മേളനത്തില്‍ ആര്‍ച്ച് ബിഷപ് മാര്‍ തോമസ് തറയില്‍ പ്രസംഗിക്കും.

13ന് 2.30 മുതല്‍ സന്നദ്ധ സുവിശേഷക സംഘത്തിന്റെയും 14 ന് 2.30 മുതല്‍ സേവികാ സംഘത്തിന്റെയും പ്രത്യേക യോഗങ്ങള്‍. 15ന് 2.30 ന് മിഷനറി സമ്മേളനം.
മാര്‍ത്തോമ്മാ സുവിശേഷ പ്രസംഗ സംഘം പ്രസിഡന്റ് ഡോ. ഐസക് മാര്‍ പീലക്‌സിനോസ് അധ്യക്ഷത വഹിക്കും. കൊളംബിയ ബൈബിള്‍ സെമിനാരി പ്രസിഡന്റ് റവ. ഡോ. വിക്ടര്‍ അലോയോ പ്രസംഗിക്കും. വ്യാഴം, വെള്ളി, ശനി ദിവസങ്ങളില്‍ വൈകിട്ട് 4 ന് യുവവേദി യോഗങ്ങള്‍ നടക്കും. ബുധന്‍ മുതല്‍ ശനി വരെ വൈകിട്ട് 7.30 മുതല്‍ 9 വരെ ഹിന്ദി, മറാഠി, തെലുങ്ക്, തമിഴ്, കന്നഡ എന്നീ ഭാഷാടിസ്ഥാനത്തിലുള്ള മിഷന്‍ ഫീല്‍ഡ് കൂട്ടായ്മകള്‍ നടക്കും.

സമാപന ദിവസമായ 16 ന് 7.30 ന് മാരാമണ്‍, ചിറയിറമ്പ്, കോഴഞ്ചേരി പള്ളികളില്‍ കുര്‍ബാനയ്ക്ക് ബിഷപ്പുമാര്‍ നേതൃത്വം നല്‍കും. 2.30 ന് സമാപന സമ്മേളനത്തില്‍ സുവിശേഷ പ്രസംഗ സംഘം പ്രസിഡന്റ് ഡോ. ഐസക് മാര്‍ പീലക്‌സിനോസ് അധ്യക്ഷത വഹിക്കും. ഡോ. തിയഡോഷ്യസ് മാര്‍ത്തോമ്മാ മെത്രാപ്പോലീത്ത സമാപന സന്ദേശം നല്‍കുമെന്ന് മാര്‍ത്തോമ്മാ സുവിശേഷ പ്രസംഗ സംഘം ജനറല്‍ സെക്രട്ടറി റവ. എബി കെ. ജോഷ്വ (ജനറല്‍ കണ്‍വീനര്‍), ലേഖക സെക്രട്ടറി പ്രഫ. ഏബ്രഹാം പി.മാത്യു, സഞ്ചാര സെക്രട്ടറി റവ. ജിജി വര്‍ഗീസ്, ട്രഷറര്‍ ഡോ. എബി തോമസ് വാരിക്കാട് എന്നിവര്‍ അറിയിച്ചു.