ഇടുക്കി: ഇടുക്കി രൂപതയുടെ വികാരി ജനറാളായി മോണ്‍. ജോസ് നരിതൂക്കില്‍ നിയമിക്കപ്പെട്ടു. ഇന്നലെ വൈകുന്നേരം രൂപതാ കേന്ദ്രത്തില്‍ നടന്ന ചടങ്ങില്‍ സത്യപ്രതിജ്ഞ ചെയ്ത് അദ്ദേഹം ചുമതല ഏറ്റെടുത്തു. കഴിഞ്ഞ എട്ടുവര്‍ഷമായി മുരിക്കാശേരി സെന്റ് മേരീസ് ഫൊറോന പള്ളി വികാരിയായി ശുശ്രൂഷ ചെയ്തു വരുന്നതിനിടയിലാണ് ഈ നിയമനം.
മുരിക്കാശേരിയില്‍ പുതിയ ദൈവാലയവും സ്‌കൂള്‍ കെട്ടിടവും ഉള്‍പ്പെടെ നിരവധിയായ നിര്‍മ്മാണ പ്രവര്‍ത്തനങ്ങള്‍ക്ക് അദ്ദേഹം നേതൃത്വം നല്‍കി. ഭൗതികവും ആത്മീയവുമായ പ്രവര്‍ത്തന ങ്ങള്‍ക്ക് നേതൃത്വം നല്‍കി മുരിക്കാശേരിക്ക് ഒരു പുതിയ മുഖം സമ്മാനിക്കാന്‍ അദ്ദേഹത്തിന് കഴിഞ്ഞു.
1962ല്‍ പനംകുട്ടി നരിതൂക്കില്‍ മാത്യു- അന്നമ്മ ദമ്പതികളുടെ മകനായി അദ്ദേഹം ജനിച്ചു. പനംകുട്ടി, പാറത്തോട് സ്‌കൂളുകളില്‍ നിന്നായി പ്രാഥമിക പഠനം പൂര്‍ത്തിയാക്കിയ അദ്ദേഹം കോതമംഗലം, വടവാതൂര്‍ സെമിനാരികളില്‍ നിന്നായി പരിശീലനം പൂര്‍ത്തിയാക്കി 1988 ഡിസംബര്‍ 27ന് മാര്‍ ജോര്‍ജ് പുന്നക്കോട്ടിലില്‍ നിന്നും പൗരോഹിത്യം സ്വീകരിച്ചു. ചെമ്പകപ്പാറ, തൊടുപുഴ, കരിമണ്ണൂര്‍, വാഴത്തോപ്പ്, നെല്ലിമറ്റം എന്നീ ഇടവകകളില്‍ സഹവികാരിയായും മാതിരപ്പള്ളി, കീരിത്തോട്, ഇടുക്കി, കൂമ്പന്‍പാറ, ചുരളി എന്നീ ഇടവകകളില്‍ വികാരിയയും ശുശ്രൂഷ ചെയ്തിട്ടുണ്ട്.
ഇവാഞ്ചലൈസേഷന്‍ 2000 ഹൈറേഞ്ച് മേഖല ഡയറക്ടര്‍, പ്രയര്‍ ഗ്രൂപ്പ് കോതമംഗലം, ഇടുക്കി രൂപതകളുടെ ഡയറക്ടര്‍, കെസിബിസി കരിസ്മാറ്റിക് കമ്മീഷന്‍ സെക്രട്ടറി, കെഎസ്ടി ചെയര്‍മാന്‍, എന്നീ മേഖലകളിലും അദ്ദേഹം ശുശ്രൂഷ ചെയ്തിട്ടുണ്ട്.
മോണ്‍. ജോസ് പ്ലാച്ചിക്കല്‍ വിരമിക്കുന്ന സാഹചര്യത്തിലാണ് മോണ്‍. ജോസ് നരിതൂക്കിലിന്റെ നിയമനം. രൂപതാ കേന്ദ്രത്തില്‍ നടന്ന ലളിതമായ ചടങ്ങില്‍ ഇടുക്കി രൂപതാ മെത്രാന്‍ മാര്‍ ജോണ്‍ നെല്ലിക്കുന്നേലിന്റെ മുമ്പാകെ സത്യപ്രതിജ്ഞ ചെയ്ത് അദ്ദേഹം ചുമതല ഏറ്റെടുത്തു എന്ന് രൂപത മീഡിയ കമ്മീഷന്‍ ഡയറക്ടര്‍ ഫാ. ജിന്‍സ് കാരക്കാട്ട് അറിയിച്ചു.
Leave a Comment
Your email address will not be published. Required fields are marked with *