ടെക്‌സസ്:  നൂറിലധികം പേരുടെ ജീവന്‍ അപഹരിച്ച ടെക്‌സസ് മിന്നല്‍ പ്രളയത്തെ തുടര്‍ന്ന് രക്ഷാപ്രവര്‍ത്തനങ്ങള്‍ തുടരുന്നതിനിടയില്‍ സങ്കീര്‍ത്തനം 34:18 ഉദ്ധരിച്ചുകൊണ്ട്് പ്രാര്‍ത്ഥന അഭ്യര്‍ത്ഥിച്ച് വൈറ്റ് ഹൗസ് ഫെയ്ത്ത് ഓഫീസ്. ‘നഷ്ടപ്പെട്ട വിലയേറിയ ജീവനുകള്‍ക്കായി പ്രാര്‍ത്ഥനയില്‍ ഞങ്ങളോടൊപ്പം ചേരാന്‍’ ഫെയ്ത്ത് ഓഫീസ് അഭ്യര്‍ത്ഥിച്ചു.

‘ഈ ദുരന്തത്തിനിടയില്‍, ഇരകള്‍ക്കും അവരുടെ കുടുംബങ്ങള്‍ക്കും, കാണാതായവരെ കണ്ടെത്തുന്നതിനായി രക്ഷാപ്രവര്‍ത്തനങ്ങള്‍ നടത്തുന്നവര്‍ക്കും വേണ്ടി പ്രാര്‍ത്ഥിക്കാന്‍ രാഷ്ട്രം ഒത്തുചേരണം. ടെക്‌സസിലെ എല്ലാവരെയും ദൈവം തന്റെ സ്‌നേഹനിര്‍ഭരമായ കരങ്ങള്‍ കൊണ്ട് പൊതിയട്ടെ’ എന്ന് കൂട്ടിച്ചേര്‍ത്തുകൊണ്ട്, സങ്കീര്‍ത്തനം 34:18 ഫെയ്ത്ത് ഓഫീസ്ഉദ്ധരിച്ചു, ‘ ഹൃദയം നുറുങ്ങിയവര്‍ക്ക് കര്‍ത്താവ് സമീപസ്ഥനാണ്. മനമുരുകിയവരെ അവിടുന്ന് രക്ഷിക്കുന്നു.’

ഗ്വാഡലൂപ്പ നദിക്കരയിലുള്ള  ‘ക്യാമ്പ് മിസ്റ്റിക്’ ഉള്‍പ്പെടുന്ന കെര്‍ കൗണ്ടിയില്‍, 28 കുട്ടികള്‍ ഉള്‍പ്പെടെ 68 മൃതദേഹങ്ങള്‍ കണ്ടെടുത്തു. 10 പെണ്‍കുട്ടികളും ഒരു കൗണ്‍സിലറും ഉള്‍പ്പെടെ 41 പേര്‍ക്കായി ടെക്‌സസിലെ രക്ഷാപ്രവര്‍ത്തകര്‍ തിരച്ചില്‍ തുടരുകയാണ്. ഹെലികോപ്റ്ററുകള്‍, ബോട്ടുകള്‍, ഡ്രോണുകള്‍, ഡൈവര്‍മാര്‍, സെര്‍ച്ച് ഡോഗുകള്‍ എന്നിവ ഉപയോഗിച്ച് തിരച്ചില്‍, രക്ഷാപ്രവര്‍ത്തനങ്ങളില്‍ സംസ്ഥാന, പ്രാദേശിക, ഫെഡറല്‍ ഏജന്‍സികളില്‍ നിന്നുള്ള 400 ലധികം പേര്‍ പങ്കാളികളാണെന്ന് തിരച്ചിലിന് നേതൃത്വം നല്‍കുന്നവര്‍ വ്യക്തമാക്കി.

ടെക്‌സസ് പ്രളയം പ്രധാന ദുരന്തമായി പ്രസിഡന്റ് ഡൊണാള്‍ഡ് ട്രംപ് പ്രഖ്യാപിച്ചത്  കൂടുതല്‍ ഫെഡറല്‍ പിന്തുണയും അടിയന്തര വിഭവങ്ങളും ലഭ്യമാവാന്‍ സഹായിക്കും.