മാഹി: മാഹി ബസലിക്കയില്‍ വിശുദ്ധ അമ്മ ത്രേസ്യയുടെ തിരുനാള്‍ ഒക്‌ടോബര്‍ അഞ്ചിന് തുടങ്ങി 22ന് സമാപിക്കും. 14, 15 തീയതികളിലാണ് പ്രധാന തിരുനാള്‍. അഞ്ചിന് രാവിലെ 11.30ന് ബസലിക്ക റെക്ടര്‍ ഫാ. സെബാസ്റ്റ്യന്‍ കാരക്കാട്ട് കൊടിയേറ്റ് നടത്തും. തുടര്‍ന്ന് 12ന് അള്‍ത്താരയിലെ രഹസ്യഅറയില്‍ സൂക്ഷിച്ചിരിക്കുന്ന വി. അമ്മത്രേസ്യയുടെ തിരുസ്വരൂപം പൊതുവണക്കത്തിനായി ബസലിക്കയില്‍ പ്രത്യേകം തയാറാക്കിയ പീഠത്തില്‍ പ്രതിഷ്ഠിക്കുന്നതോടെ തിരുനാള്‍ ആഘോഷങ്ങള്‍ക്ക് തുടക്കമാകും. തീര്‍ത്ഥാടകര്‍ക്ക് തിരുസ്വരൂപത്തില്‍ പൂമാലകള്‍ അര്‍പ്പിക്കാനും മെഴുകുതിരി തെളിക്കാനും സൗകര്യമുണ്ടാകും.

ആറുമുതല്‍ 13 വരെയുള്ള വിവിധ ദിവസങ്ങളില്‍ കോട്ടപ്പുറം ബിഷപ് ഡോ. അംബ്രോസ് പുത്തന്‍വീട്ടില്‍, കണ്ണൂര്‍ ബിഷപ് ഡോ. അലക്‌സ് വടക്കുംതല, ഫാ. സനല്‍ ലോറന്‍സ്, ഫാ. ജോസഫ് കൊട്ടിയത്ത്, ഫാ. മാര്‍ട്ടിന്‍ ഇലഞ്ഞിപ്പറമ്പില്‍, ഫാ. ഡേവിഡ് സഹായ രാജ്, ഫാ. ആന്‍സില്‍ പീറ്റര്‍, ഫാ. ജോണ്‍സണ്‍ അവരവേ എന്നിവരുടെ മുഖ്യകാര്‍മിത്വത്തില്‍ വിശുദ്ധ കുര്‍ബാന അര്‍പ്പിക്കും.

പ്രധാന തിരുനാള്‍ ദിനമായ 14ന് രാവിലെ 10ന് ഫാ. വിമല്‍ ഫ്രാന്‍സിസ് ദിവ്യബലിയര്‍പ്പിക്കും. വൈകുന്നേരം 5.30ന് കോഴിക്കോട് രൂപത വികാരി ജനറാള്‍ മോണ്‍. ജെന്‍സണ്‍ പുത്തന്‍വീട്ടില്‍ വിശുദ്ധ കുര്‍ബാന അര്‍പ്പിക്കും. അലങ്കരിച്ച തേരില്‍  വിശുദ്ധ അമ്മത്രേസ്യയുടെ തിരുസ്വരൂപം വഹിച്ചുകൊണ്ടുള്ള നഗരപ്രദക്ഷിണം രാത്രിയില്‍ നടക്കും.

15ന് പുലര്‍ച്ചെ ഒന്നു മുതല്‍ രാവിലെ 6 വരെ ശയനപ്രദക്ഷിണം. രാവിലെ 10.30ന് കോഴിക്കോട് അതിരൂപതാധ്യക്ഷന്‍ ഡോ. വര്‍ഗീസ് ചക്കാലയ്ക്കല്‍ വിശുദ്ധ കുര്‍ബാന അര്‍പ്പിക്കും. വൈകുന്നേരം അഞ്ചിന് സ്‌നേഹ സംഗമം നടക്കും. 19ന് വൈകുന്നേരം ആറിന് തലശേരി അതിരൂപതാധ്യക്ഷന്‍ മാര്‍ ജോസഫ് പാംപ്ലാനി വിശുദ്ധ കുര്‍ബാനയര്‍പ്പിക്കും. തിരുനാള്‍ സമാപന ദിനമായ 22ന് രാവിലെ 10.30ന് കണ്ണൂര്‍ രൂപത സഹായ മെത്രാന്‍ ഡോ. ഡെന്നിസ് കുറുപ്പശേരി ദിവ്യബലിയര്‍പ്പിക്കും.

ബസലിക്കയില്‍ പുതുതായി നിര്‍മ്മിച്ച നിത്യാരാധന ചാപ്പല്‍ ആര്‍ച്ചുബിഷപ് ഡോ. വര്‍ഗീസ് ചക്കാലയ്ക്കല്‍ 28ന് രാവിലെ ഒമ്പതിന് വെഞ്ചരിക്കും.