കൊച്ചി: ജസ്റ്റിസ് ജെ.ബി കോശി കമ്മീഷന്‍ റിപ്പോര്‍ട്ട് പുറത്തു വിടുകയും ഉടന്‍ നടപ്പിലാക്കുകയും ചെയ്യണമെന്ന് പിഒസി കമ്മീഷന്റെ ജനറല്‍ ബോഡി യോഗം സംസ്ഥാന സര്‍ക്കാരിനോട് ആവശ്യപ്പെട്ടു.

2023 മെയ് 17 ന് കമ്മീഷന്‍ റിപ്പോര്‍ട്ട് സര്‍ക്കാരിന് സമര്‍പ്പിച്ചിട്ടും ഇതുവരെയും റിപ്പോര്‍ട്ട് പ്രസിദ്ധീകരിക്കുക പോലും ചെയ്യാത്ത നിലപാട് ക്രൈസ്തവ സമൂഹത്തോടുള്ള അവഗണനയാണെന്ന്  പാലാരിവട്ടം പിഒസിയില്‍ നടന്ന സമ്മേളനം വിലയിരുത്തി. വരാനിരിക്കുന്ന തിരഞ്ഞെടുപ്പുകളില്‍ സമ്മതിദാനാവകാശം വിവേകപൂര്‍വ്വം വിനിയോഗിക്കണമെന്ന് സമ്മേളനം ആഹ്വാനം ചെയ്തു.

കെസിബിസി വൈസ് പ്രസിഡന്റ് ബിഷപ് മാര്‍ പോളി കണ്ണൂക്കാടന്‍ അധ്യക്ഷത വഹിച്ചു. സെക്രട്ടറി ജനറല്‍  ബിഷപ് ഡോ. അലക്സ് വടക്കുംതല, ഡെപ്യൂട്ടി സെക്രട്ടറി ജനറല്‍ ഫാ. തോമസ് തറയില്‍ എന്നിവര്‍ പ്രസംഗിച്ചു.

കേരളത്തിലെ 32 രൂപതകളുടെയും  സംഘടനകളുടെയും  പ്രതിനിധികളും കെസിബിസി കമ്മീഷന്‍ സെക്രട്ടറിമാരും  പി ഒസി കൗണ്‍സിലിന്റെ പൊതുയോഗത്തില്‍ പങ്കെടുത്തു. വാര്‍ഷിക റിപ്പോര്‍ട്ടും കണക്കും യോഗത്തില്‍ അവതരിപ്പിച്ചു. സഭയോടും സമുദായത്തോടും ബന്ധപ്പെട്ട വിവിധ വിഷയ ങ്ങളെകുറിച്ച് സമ്മേളനം ചര്‍ച്ച ചെയ്തു.