തൃശൂര്‍: കാന്‍സര്‍ രോഗംമൂലം മുടി നഷ്ടമായ 121 പേര്‍ക്ക്  അമല മെഡിക്കല്‍ കോളേജ് ആശുപത്രി സൗജന്യമായി വിഗ്ഗുകള്‍ നല്‍കി.

അമല ഓഡിറ്റോറിയത്തില്‍ നടന്ന 39-ാമത് സൗജന്യ വിഗ്ഗ് വിതരണ സമ്മേളനം പാലക്കാട് രൂപത മുന്‍ ബിഷപ് മാര്‍ ജേക്കബ് മനത്തോടത്ത് ഉദ്ഘാടനം  ചെയ്തു.

അമല മെഡിക്കല്‍ കോളേജ് ഡയറക്ടര്‍ ഫാ ജൂലിയസ് അറയ്ക്കല്‍ സിഎംഐ അധ്യക്ഷത വഹിച്ചു. ജോയിന്റ് ഡയറക്ടര്‍  ഫാ. ജെയ്‌സണ്‍ മുണ്ടന്‍മാണി സിഎംഐ, ഡോ. രാകേഷ് എല്‍. ജോണ്‍, സീന അഗസ്റ്റിന്‍, ഡോ. സിസ്റ്റര്‍ നാന്‍സി എസ്. എച്ച് ,  പി.കെ സെബാസ്റ്റ്യന്‍ എന്നിവര്‍ പ്രസംഗിച്ചു.

സ്തനാര്‍ബുദം ബാധിച്ച 30  രോഗികള്‍ക്ക് കൃത്രിമ സ്തന ങ്ങളും മീറ്റിങ്ങില്‍ സൗജന്യമായി വിതരണം ചെയ്തു.  കേശദാനം-സ്‌നേഹദാനം ക്യാമ്പുകള്‍ സംഘടിപ്പിച്ച 18 സ്ഥാപനങ്ങളെയും അമല ആശുപത്രിയില്‍വച്ച് മുടി മുറിച്ചു നല്‍കിയ 23 വ്യക്തികളെയും മീറ്റിങ്ങില്‍ മെമന്റോയും സര്‍ട്ടിഫിക്കറ്റും നല്‍കി ആദരിച്ചു.

സാഹിത്യകാരനും കാന്‍സര്‍ സര്‍വൈവറുമായ ഫ്രാന്‍സിസ് അസീസി രചിച്ച ‘കാന്‍സറും പ്രണയവും ചൂടുള്ള പൊറോട്ടയും’ എന്ന പുസ്തകവും ചടങ്ങില്‍ പ്രകാശനം ചെയ്തു.

ഇതിനോടകം 2397 കാന്‍സര്‍ രോഗികള്‍ക്ക്  അമല മെഡിക്കല്‍ കോളേജ് ആശുപത്രിയില്‍ നിന്നും സൗജന്യമായി വിഗ്ഗുകളും 700 സ്തനാര്‍ബുദ രോഗികള്‍ക്ക് സൗജന്യമായി നിറ്റഡ് നോക്കേഴ്‌സും നല്‍കാന്‍ കഴിഞ്ഞതായി അമല ആശുപത്രി ജോയിന്റ് ഡയക്ടര്‍ ഫാ. ജെയ്‌സണ്‍ മുണ്ടന്‍മാണി പറഞ്ഞു.

520 പുരുഷന്മാര്‍ ഉള്‍പെടെ  3 വയസു മുതല്‍ 70 വയസു വരെ യുള്ള സമൂഹത്തിന്റെ വിവിധ മേഖലകളില്‍ പ്രവര്‍ത്തിക്കുന്ന 22,000 പേര്‍ ഈ സ്‌നേഹ കൂട്ടായ്മയിലേക്ക് 30 സെന്റി മീറ്റര്‍ നീളത്തില്‍ മുടി ദാനം ചെയ്തതുകൊണ്ടാണ് സൗജന്യമായി വിഗ്ഗുകള്‍ കൊടുക്കുവാന്‍ കഴിഞ്ഞതെന്നും ഫാ. ജെയ്‌സണ്‍ പറഞ്ഞു. തുടര്‍ന്നും അമല പാലിയറ്റീവ് കെയര്‍ വിഭാഗത്തിന്റെ നേതൃത്വത്തില്‍ കാന്‍സര്‍ രോഗികള്‍ക്ക് സൗജന്യമായി വിഗ്ഗുകള്‍ നല്‍കാനാണ് ആഗ്രഹിക്കുന്നതെന്നും അദ്ദേഹം വ്യക്തമാക്കി.

അമല ആശുപത്രിയില്‍ മാത്രമല്ല മറ്റ് ആശുപത്രികളില്‍ ചികിത്സ തേടുന്ന രോഗികള്‍ക്കും അമല ആശുപത്രിയിലെ പാലിയറ്റീവ് വിഭാഗത്തില്‍ നിന്നും വിഗ്ഗുകള്‍ സൗജന്യമായി നല്‍കിവരുന്നുണ്ടെന്ന് ആശുപത്രി അധികാരികള്‍ പറഞ്ഞു.