കൊച്ചി: മോണ്‍. ഇമ്മാനുവല്‍ ലോപ്പസ് ദൈവദാസ പ്രഖ്യാപനം ജൂലൈ 19ന് നടക്കും. വൈകുന്നേരം 4ന് ദൈവദാസപ്രഖ്യാപന ചടങ്ങുകള്‍ക്ക് തുടക്കം കുറിച്ചുകൊണ്ട് വരാപ്പുഴ അതിരൂപത മെത്രാസന മന്ദിരത്തില്‍ നിന്നും വരാപ്പുഴ മെത്രാപ്പോലീത്ത ഡോ. ജോസഫ് കളത്തിപ്പറമ്പില്‍ ദീപശിഖ ചാത്യാത് ദൈവാലയ വികാരിക്ക് നല്‍കും. തുടര്‍ന്ന് ദീപശിഖാ പ്രയാണം ആരംഭിക്കും. എറണാകുളം ഇന്‍ഫന്റ് ജീസസ് പള്ളിയില്‍ നിന്നും ആരംഭിക്കുന്ന മോണ്‍. ഇമ്മാനുവല്‍ ലോപ്പസിന്റെ ഛായാചിത്ര പ്രയാണവും ഇതിനോട് കൂടിച്ചേരും. എറണാകുളം ക്യുന്‍സ് വാക്ക്‌വേയില്‍ വച്ച് ചാത്യാത് ഇടവകാംഗങ്ങള്‍ പ്രയാണങ്ങളെ സ്വീകരിക്കും. തുടര്‍ന്ന് മോണ്‍. ഇമ്മാനുവല്‍ ലോപ്പസിന്റെ മാതൃദൈവാലയമായ ചാത്യാത് മൗണ്ട് കാര്‍മല്‍ ദൈവാലയങ്കണത്തില്‍ വച്ച് വരാപ്പുഴ അതിരൂപത വികാര്‍ ജനറല്‍മാര്‍ ദീപശിഖയും ഛായാചിത്രവും സ്വീകരിക്കും.
തുടര്‍ന്ന് നടക്കുന്ന ദിവ്യബലിയില്‍ വരാപ്പുഴ ആര്‍ച്ചുബിഷപ് ഡോ. ജോസഫ് കളത്തിപ്പറമ്പില്‍ മുഖ്യകാര്‍മ്മികനാകും. കണ്ണൂര്‍ രൂപതാ മെത്രാന്‍ ഡോ.അലക്‌സ് വടക്കുംതല സുവിശേഷ പ്രഘോഷണം നടത്തും. കോഴിക്കോട് രൂപതാ മെത്രാന്‍ ഡോ. വര്‍ഗീസ് ചക്കാലക്കല്‍, കോട്ടപ്പുറം മുന്‍ മെത്രാന്‍ ഡോ. ജോസഫ് കരിക്കശേരി, ആര്‍ച്ചുബിഷപ് എമിരിറ്റസ് ഡോ. ഫ്രാന്‍സിസ് കല്ലറക്കല്‍, നെയ്യാറ്റിന്‍കര മെത്രാന്‍ ഡോ. വിന്‍സ ന്റ് സാമുവല്‍ എന്നിവര്‍ സഹകാര്‍മികരാകും.
മോണ്‍. ഇമ്മാനുവല്‍ ലോപ്പസിനെ ദൈവദാസ പദവിയിലേക്ക് ഉയര്‍ത്തികൊണ്ടുള്ള പേപ്പല്‍ അനുമതി ദിവ്യബലിമധ്യേ വായിക്കും. തുടര്‍ന്ന് മോണ്‍. ഇമ്മാനുവല്‍ ലോപ്പസിനെക്കുറിച്ച് ഇഗ്നേഷ്യസ് ഗോന്‍സാല്‍വസ് എഴുതിയ ജീവചരിത്ര ഗ്രന്ഥം ജസ്റ്റിസ് സുനില്‍ തോമസിന് നല്‍കികൊണ്ട് ആര്‍ച്ചുബിഷപ് ഡോ. കളത്തിപ്പറമ്പില്‍ പ്രകാശനം ചെയ്യും. എറണാകുളം സിഎസിയുടെ നേതൃത്വത്തില്‍ തയാറാക്കിയ കാസെറ്റ് പ്രകാശനവും നടക്കും. തുടര്‍ന്ന് സിമിത്തേരിയിലെ കര്‍മങ്ങള്‍ ആരംഭിക്കും.
മോണ്‍. ഇമ്മാനുവല്‍ ലോപ്പസിനെ വിശുദ്ധ പദവിയിലേക്ക് ഉയര്‍ത്താനുള്ള നാമകരണ പ്രാര്‍ത്ഥനയ്ക്ക് ബിഷപ് ഡോ.വര്‍ഗീസ് ചക്കാല യ്ക്കല്‍ നേതൃത്വം നല്‍കും. തുടര്‍ന്ന് മോണ്‍ സിഞ്ഞോറിന്റെ സ്മൃതിമണ്ഡപത്തില്‍ ബിഷപ് ഡോ. വിന്‍സന്റ് സാമുവല്‍ പുഷ്പാര്‍ച്ചന നടത്തും. തുടര്‍ന്ന് സിമിത്തേരിയില്‍ പൊതുജനങ്ങള്‍ക്ക് പ്രവേശനം നല്‍കും.
Leave a Comment
Your email address will not be published. Required fields are marked with *