ഇടുക്കി: വാഹനാപകടത്തില്‍ പരിക്കേറ്റ് ചികിത്സയിലായിരുന്ന സിസ്റ്റര്‍ മേരിക്കുട്ടി ജെയിംസ് (ബിന്‍സി എസ്.എച്ച്-50) മരിച്ചു. ഇടുക്കി ജില്ലയിലെ കാന്തിപ്പാറ തിരുഹൃദയ മഠാംഗമായ സിസ്റ്റര്‍ ബിന്‍സി കാന്തിപ്പാറ സെന്റ് സെബാസ്റ്റ്യന്‍ ഹൈസ്‌കൂളില്‍ യുപി വിഭാഗം അധ്യാപികയായിരുന്നു. കഴിഞ്ഞ ശനിയാഴ്ചയാണ് രാജകുമാരിയില്‍വച്ച് സിസ്റ്റര്‍ സഞ്ചരിച്ചിരുന്ന ഓട്ടോറിക്ഷയില്‍ നിയന്ത്രണം വിട്ടുവന്ന കാര്‍ ഇടിച്ചത്. ഗുരുതരമായി പരിക്കേറ്റ സിസ്റ്റര്‍ ബിന്‍സി ആലുവ രാജഗിരി ആശുപത്രിയില്‍ തീവ്രപരിചരണ വിഭാഗത്തില്‍ ചികിത്സയിലായിരുന്നു. സിസ്റ്റര്‍ ബിന്‍സിയുടെ ഒപ്പം ഓട്ടോയില്‍ ഉണ്ടായിരുന്ന സിസ്റ്റര്‍ അല്‍ഫോന്‍സയ്ക്കും ഓട്ടോറിക്ഷാ ഡ്രൈവര്‍ക്കും പരിക്കുണ്ട്.

നെടുങ്കണ്ടം, കറുകപ്പിള്ളി കുടുംബാംഗമാണ് സിസ്റ്റര്‍ ബിന്‍സി. സംസ്‌കാര ശുശ്രൂഷകള്‍ നാളെ (മെയ് 31) രാവിലെ 10ന് രാജമുടി പ്രൊവിഷ്യല്‍ ഹൗസ് ചാപ്പലില്‍ ഇടുക്കി രൂപതാധ്യക്ഷന്‍ മാര്‍ ജോണ്‍ നെല്ലിക്കുന്നേലിന്റെ മുഖ്യകാര്‍മികത്വത്തില്‍ നടക്കും.