വാഷിംഗ്ടണ് ഡി.സി: ലോകത്തിലെ ഏറ്റവും വലിയ മനുഷ്യാവകാശ പ്രകടനമെന്ന് വിശേഷിപ്പിക്കപ്പെടുന്ന ‘മാര്ച്ച് ഫോര് ലൈഫ്’ ഇന്ന് (ജനുവരി 23-ന്) അമേരിക്കന് തലസ്ഥാനമായ വാഷിംഗ്ടണ് ഡി.സിയില് നടക്കും. പതിനായിരക്കണക്കിന് വിശ്വാസികളും പ്രോ-ലൈഫ് പ്രവര്ത്തകരും അണിചേരും. ‘ജീവന് ഒരു സമ്മാനം’ എന്നതാണ് ഈ വര്ഷത്തെ പ്രമേയം.
യുഎസ് വൈസ് പ്രസിഡന്റ് ജെ.ഡി. വാന്സ് തുടര്ച്ചയായ രണ്ടാം വര്ഷവും ഈ റാലിയില് മുഖ്യാതിഥിയായി പങ്കെടുത്ത് സംസാരിക്കും. കൂടാതെ യു.എസ്. ഹൗസ് സ്പീക്കര് മൈക്ക് ജോണ്സണ്, ജനപ്രതിനിധികള്, ബിഷപ്പുമാര് തുടങ്ങിയവരും മാര്ച്ചില് പങ്കെടുക്കും.
നാഷണല് മാളില് ‘സാങ്ക്ടസ് റിയല്’ എന്ന പ്രശസ്ത ക്രിസ്ത്യന് ബാന്ഡിന്റെ സംഗീത പരിപാടിയോടെയാണ് മാര്ച്ച് ആരംഭിക്കുന്നത്. തുടര്ന്ന് സുപ്രീം കോടതി മന്ദിരത്തിലേക്ക് മാര്ച്ച് നടത്തും. മാര്ച്ചിനോടനുബന്ധിച്ച് സിസ്റ്റേഴ്സ് ഓഫ് ലൈഫും നൈറ്റ്സ് ഓഫ് കൊളംബസും സംയുക്തമായി ലൈഫ് ഫെസ്റ്റ് സംഘടിപ്പിക്കുന്നുണ്ട്.
1973-ലെ ‘റോ വേഴ്സസ് വേഡ്’ വിധിയിലൂടെ ഗര്ഭച്ഛിദ്രം നിയമവിധേയമാക്കിയതിനെതിരെയുള്ള പ്രതിഷേധമായാണ് 1974-ല് മാര്ച്ച് ഫോര് ലൈഫ് ആരംഭിച്ചത്. 2022-ല് ഈ വിധി സുപ്രീം കോടതി റദ്ദാക്കിയെങ്കിലും, ഗര്ഭസ്ഥ ശിശുക്കളുടെ അവകാശങ്ങള് സംരക്ഷിക്കാനും ‘ജീവന് അതിന്റെ തുടക്കം മുതല് ആഘോഷിക്കപ്പെടേണ്ട ഒന്നാണ്’ എന്ന സന്ദേശം ലോകത്തിന് നല്കാനും മാര്ച്ച് ഫോര് ലൈഫ് എല്ലാ വര്ഷവും നടത്തുന്നു.
Leave a Comment
Your email address will not be published. Required fields are marked with *